Tədqiqatçılar Ağrıda Nuhun gəmisini axtaracaqlar
ABŞ-dan bir qrup müstəqil tədqiqatçı Nuhun gəmisinin qalıqlarını tapmaq məqsədilə Ağrı Tendürək dağının Durupınar silsiləsində araşdırmalara başlayıb.
Böyük Ağrı zirvəsindən 29 kilometr cənubda yerləşən və 164 metr uzunluğunda olan Durupınar yatağının forması gəmini xatırladır. Bu ərazi İslam, Yəhudilik və Xristianlıq kimi İbrahim dinlərindəki Nuh tufanı rəvayəti ilə əlaqələndirilir.
Crossmedia.az xarici mediaya istinadən bildirir ki, Durupınar sahəsi ilk dəfə 1948-ci ildə müəyyən edilib və 1970-ci illərdə özünü həvəskar arxeoloq adlandıran Ron Wyatt bu ərazidə Nuhun gəmisinin yerləşdiyini iddia edib. O dövrdə bu fikir geniş yayılmışdı.
Hazırda bu sahəyə maraq göstərən Kaliforniyadan bir qrup araşdırmaçılar “Nuhun Gəmisinin Drenaj Layihəsi” adı altında fəaliyyət göstərirlər. Lakin onların yaxın müddətdə qazıntı işlərinə başlamaq planı yoxdur. Komanda ilk növbədə ərazinin qorunmasına və yerli elm adamlarının əlavə tədqiqat aparmasına üstünlük verir.
Komandanın bəyanatında qeyd olunub ki, sərt iqlim şəraiti və torpaq sürüşmələri nəzərə alınaraq, yerin geofiziki tədqiqi, torpaq nümunələrinin analizi və radar skanları kimi dağıdıcı olmayan metodlara üstünlük veriləcək. Qazıntılar yalnız kifayət qədər dəlil toplandıqdan və mühafizə planı hazırlandıqdan sonra mümkün ola bilər.
Qeyd edək ki, indiyədək aparılan elmi araşdırmalar Durupınar sahəsini Nuhun tufanı ilə əlaqələndirən heç bir sübut ortaya qoymayıb. Ron Wyatt ilə birlikdə bölgədə araşdırma aparmış tədqiqatçı David Fasold da bu formanın təbii geoloji proseslərin nəticəsi olduğunu iddia edib.
Nuh tufanı hekayəsi Tövrat, İncil və Quranda fərqli detallarla izah olunur. İslam Ensiklopediyasına görə, Quranda Nuhun qövmünün imansızlıqda israr etdikdən sonra tufanla cəzalandırıldığı, Nuhun isə ailəsi və iman gətirənlərlə birlikdə gəmi vasitəsilə xilas olduğu bildirilir.
Zəhra Ağayeva
14:10 16.05.2025
Oxunuş sayı: 10199
