Trampdan Fransaya tənqid: “Savaşı biz qazandıq, amma bayram edən başqalarıdır”
ABŞ Prezidenti Donald Tramp Orta Şərq səfəri çərçivəsində Qətərdəki El Udeid hərbi bazasında ABŞ əsgərləri ilə görüşüb. Burada çıxış edən Tramp İkinci Dünya Müharibəsində qazanılan qələbənin 80 illiyinin qeyd olunmamasından gileylənib və Fransa başda olmaqla Avropa ölkələrini tənqid edib: “Bizdən başqa hər kəs qələbə günü bayram edirdi, amma savaşı biz qazandıq,” deyə o bildirib.
Crossmedia.az xarici mediaya istinadən bildirir ki, Tramp Fransanı sevdiyini desə də, ABŞ-ın qələbədə daha böyük rol oynadığını vurğulayıb. “Hitler Eyfel Qülləsində çıxış edəndə vəziyyətin o qədər də ideal olmadığı bəlliydi,” deyən Tramp Fransanın işğalını xatırladaraq ironik şəkildə münasibət bildirib.
Qətər səfəri zamanı Tramp Emiri Şeyx Təmim bin Hamed Al Sani ilə də görüşüb. Dövlət ziyafətində çıxış edən Tramp İranın nüvə proqramına qarşı mübarizədə Qətərdən vasitəçilik dəstəyi istəyib: “İran məsələsində bizə yardım edə biləcəyinizi ümid edirəm. Bu, təhlükəli vəziyyətdir və biz düzgün olanı etmək istəyirik.”
Qətər uzun müddətdir ABŞ və İran arasında vasitəçi rolunu oynayır. Trampın bu çağırışı, Riyadda keçirilən Körfəz Əməkdaşlıq Şurası toplantısında etdiyi çıxışın davamı olub. O, Tehranla mümkün razılaşmanın şərti kimi İranın bölgədəki silahlı qruplara dəstəyini dayandırmasını göstərib.
İranın nüvə proqramı ilə bağlı narahatlığını ifadə edən Tramp, diplomatik həll yolunun tükənmək üzrə olduğunu bildirib. “Belə şeylər başlayır və nəzarətdən çıxır,” deyən Tramp, regionda qarşıdurmanın qarşısının alınmasının vacibliyini vurğulayıb.
Fatimə Nəbiyeva
14:00 16.05.2025
Oxunuş sayı: 9947
