Misir və İƏT Trampın "Qəzza planına" qarşı hərəkətə keçir!
Misir, ABŞ-nin Qəzzada fələstinliləri zorla köçürmə planına qarşı çıxmaq üçün İslam Əməkdaşlıq Təşkilatının (İƏT) fövqəladə iclasının keçirilməsi ilə bağlı prinsipial razılıq əldə etdiyini açıqlayıb.
Crossmedia.az xarici KİV-ə istinadən xəbər verir ki, Misirin xarici işlər naziri Bədr Əbdüləti, Səudiyyə Ərəbistanı, Pakistan, İran və İordaniya da daxil olmaqla, İƏT-ə üzv olan bir sıra ölkələrin xarici işlər nazirləri ilə görüşlər keçirib və Fələstin məsələsi müzakirə edilib.
Fevralın 27-də Qahirədə keçirilməsi planlaşdırılan fövqəladə ərəb sammitindən sonra İƏT-in fövqəladə nazirlər iclasının təşkil olunması ilə bağlı prinsipial razılıq əldə edilib.
İclasda, xüsusilə, Fələstinin öz müqəddəratını təyinetmə hüququ ilə bağlı müzakirələr aparılacaq.
Xatırladaq ki, Misir, Fələstin məsələsi ilə bağlı son hadisələri müzakirə etmək üçün fevralın 27-də fövqəladə ərəb zirvəsinə ev sahibliyi edəcəyini açıqlamışdı.
İranın xarici işlər naziri Abbas Ərqaçi də fevralın 9-da İƏT-in baş katibi Hüseyn İbrahim Taha ilə telefon danışığında, ABŞ administrasiyasının Qəzzada fələstinliləri zorla köçürmə planına qarşı təcili toplantı keçirilməsinə çağırış edib.
Aybəniz Səfərova
00:25 12.02.2025
Oxunuş sayı: 7535
