"Mübariz Ruh: Ölümsüz Qəhrəman"
Azərbaycan, dünyada Vətən sevgisi ilə alovlanan, onun uğrunda fədakarlıq etməyə hər an hazır olan gəncləri ilə tanınır. Bu torpağın yetirmələri üçün Vətən sevgisi hər şeydən ucadır və lazım gəldikdə, onun uğrunda canlarını belə əsirgəmirlər.
Vaxtilə bizdən öz həyatını əsirgəməyən igid qəhrəmanlarımız, bu yolda bizə təkcə örnək deyil, həm də ən böyük müəllimlərimizdir. Onların göstərdiyi şücaət, Vətənə sədaqət nümunəsi hər bir azərbaycanlı üçün yol göstərən bir mayakdır.
Bəs Vətən nədir? Bu sözə dəyər və məna qazandırmaq üçün, bir xalqın tarix boyu öz torpağına sahib çıxan, onun uğrunda canından keçən qəhrəmanları olmalıdır. Azərbaycan da məhz bu cür qəhrəmanları ilə Vətən sözünün haqqını verən dövlətlərdən biridir!
Bu gün o qəhrəmanlardan Mübariz İbrahimovun doğum günüdür. Mübariz adı elə bu igidimizi xarakterizə edən ən gözəl isimdir. O həqiqətən də əsl Mübariz idi.
Mübariz İbrahimov 7 fevral 1988-ci ildə, Biləsuvar rayonunun Əliabad kəndində dünyaya göz açıb. Mübariz 1994-cü ildə Malik Piriyev adına Əliabad kənd ibtidai məktəbinə daxil olmuşdur. O, məktəbdə keçilən idman dərsləri ilə kifayətlənməyib rayona gedər, 12–13 yaşlarından idmanın boks növü ilə məşğul olardı. O, 2005-ci ildə orta təhsilini başa vurduqdan sonra hərbi xidmətə çağırılmışdır. Azərbaycan Daxili İşlər Nazirliyinə bağlı xüsusi təyinatlı qüvvələrdə xidmət etmiş İbrahimov 2007-ci ildə çavuş rütbəsi ilə hərbi xidmətini başa vurmuşdur. O, bir müddət mülki işdə çalışdıqdan sonra 2009-cu ilin sentyabr ayında gizir kurslarına daxil olmuşdur, sonra Naftalanda xidmət etmişdir. Mübariz İbrahimov həmin ilin avqustunda könüllü olaraq Azərbaycan Silahlı Qüvvələrində xidmət etmək üçün ərizə ilə müraciət etmiş, gizir kimi Tərtər rayonunda hərbi hissələrdən birində xidmət etməyə başlamışdır.
Azərbaycan Silahlı Qüvvələrində xidmət etmiş gizir Mübariz İbrahimov 18 iyun 2010-cu ildə, saat 23:30 radələrində xidmət etdiyi bölmədə heç kimə xəbər vermədən Dağlıq Qarabağ təmas xəttinə doğru irəliləməyə başlamışdır. O, təkbaşına 1 kilometr məsafəlik minalanmış ərazidən keçərək Tərtər rayonunun Çaylı kəndində yerləşən Ermənistan Silahlı Qüvvələrinin zastavasına basqın etmişdir. İlkin iddiaya görə, bu döyüşdə İbrahimov dörd erməni əsgərini öldürmüş və daha dördünü yaralamışdır. Həmin gecə də qəhrəmancasına şəhid olmuşdur. Mübarizədən geriyə nə bir övlad nədə bir ailə qaldı. Ondan geriyə qalan sadəcə bir məktub idi. Şəhadətindən xəbər verən ayrılıq məktubu...
Mübariz İbrahimov Azərbaycan şanlı tarixinə adını qızıl hərflərlə yazdırmış qəhrəmanımızdır. Vətən qeyrətini hər şeydən uca tutan qəhrəmanımız, doğum günün mübarək!
Ayhan Ağarzayev
10:47 07.02.2025
Oxunuş sayı: 7356
