Türkiyədə yanan otelin sahibinin mafiya ilə əlaqəsi olduğu iddia edilir
Türkiyədə Boludakı Grand Kartal otelində baş verən yanğında 76 nəfər həyatını itirib, 51 nəfər isə yaralanaraq xəstəxanaya yerləşdirilib. Bəs yanğının baş verdiyi Grand Kartal oteli kimindir, sahibi kimdir?
Crossmedia.az xarici KİV-ə istinadən xəbər verir ki, Grand Kartal otelini inşa edən şəxs iş adamı Mazhar Murtezaoğlu olub. Onun vəfatından sonra isə otel qızı Emine Ergül və kürəkəni Halit Ergül tərəfindən idarə olunmağa başlanıb. Otelin sahibi Halit Ergül hazırda Qərbi Qaradəniz Otel Sahibləri Dərnəyinin sədri kimi də fəaliyyət göstərir.
Bundan əlavə, Halit Ergül Bolu şəhərində yerləşən Gazelle Resort & SPA otelinin də sahibidir.
Otelin qurucusu Mazhar Murtezaoğlu 1960-cı illərdə Boluda fəaliyyət göstərən "Bolu Dağ Kantini"ni quraraq burada hazırladığı yeməklərlə məşhurlaşıb.
Belə ki, 1974-cü ildə Kartalkaya Xizək Mərkəzinin təməllərini atan Murtezaoğlu, İsveçrədən ilham alaraq Kartalkayanın zirvəsində xizək mərkəzi yaratmaq arzusunu reallaşdırıb. Əvvəlcə Kartal Otelini, sonra isə Grand Kartal Otelini inşa edib.
Qeyd edək ki, qış tətili üçün ailələri və uşaqları ilə birlikdə Kartalkayaya gələn insanlara məzar olan Grand Kartal Otelinin sahibi Halit Ergülün daha əvvəl mafiya ilə əlaqəsi olduğuna dair iddialar gündəmə gəlib.
Fatimə Məmmədova
09:55 24.01.2025
Oxunuş sayı: 7228
