Milli musiqimizin qüruru: Şəfiqə Axundova
Bu gün Azərbaycan musiqi sənətinin incisi, milli musiqi irsimizin unudulmaz simalası olan Şəfiqə Axundovanın doğum günüdür. O, dərin musiqi zövqü, yaradıcılıq enerjisi və özünəməxsus üslubu ilə həm Azərbaycanda, həm də xaricdə tanınırdı. Şəfiqə xanım, öz zəhməti və istedadı ilə qadın bəstəkarların nəyə qadir olduğunu göstərərək milli musiqi tarixində əbədi iz qoydu. Onun yaradıcılığı yalnız musiqi ilə deyil, həm də zəngin mənəvi dəyərlərlə zəngindir.
Şəfiqə Axundova 1924-cü ildə qədim Şəkinin sayılıb-seçilən Axundovlar ailəsində dünyaya göz açıb. Atası Qulam Axundov dövrünün tanınmış ziyalısı, müxtəlif rəhbər vəzifələrdə çalışan nüfuzlu şəxs, anası Züleyxa xanım isə evdar qadın idi. Belə bir ailədə böyüyən Şəfiqə xanımın uşaqlıqdan musiqiyə və incəsənətə olan marağı tezliklə böyük uğurlara çevrildi.
1943-1944-cü illərdə Şəfiqə xanım Asəf Zeynallı adına Bakı Musiqi Məktəbində təhsil alır, sonra isə Azərbaycan Dövlət Konservatoriyasında həm musiqi nəzəriyyəsi, həm də bəstəkarlıq ixtisası üzrə B.Zeydmanın sinfini bitirir. Üzeyir Hacıbəyli onun yaradıcılığını yaxından izləyir və gənc bəstəkarlara milli musiqinin əsaslarını öyrətmək üçün şəxsən rəhbərlik edir. Bu illər ərzində Şəfiqə Axundova öz yaradıcılıq bacarıqlarını inkişaf etdirərək klassik musiqi ilə milli motivləri ustalıqla birləşdirdi.
1972-ci ildə Şəfiqə Axundovanın “Gəlin qayası” operası milli opera tariximizdə ilk qadın bəstəkar operası kimi yer aldı. Onun yaradıcılığına xalq musiqisinin zənginliyi, melodik rəngarəngliyi və qadın ruhunun dərinliyi hakimdir. Bir çox mahnı, romans və simfonik əsər bəstələyən Şəfiqə xanım, Azərbaycan musiqisinin inkişafına əvəzsiz töhfələr verib. Xalq Artisti fəxri adına layiq görülən böyük sənətkarımızın yaradıcılığı bu gün də xalqımızın musiqi irsinin ayrılmaz hissəsidir.
Ayhan Ağarzayev
18:36 21.01.2025
Oxunuş sayı: 1241
