Tofiq Zülfüqarov: “Zəngəzur dəhlizinin bərpası İranın da xeyrinə olacaq”
Rusiya Xarici İşlər Nazirliyinin sözçüsü Mariya Zaxarova yanvarın 16-da Rusiyanın üçtərəfli razılaşmalar əsasında bütün nəqliyyat vasitələrinin açılmasından tərəf olduğunu, lakin Ermənistandan bu münasibəti görmədiyini və verdikləri sözə sadiq qalmadıqlarını bildirib. Rəsmi Moskva zaman-zaman Qərb ölkələrini regiona müdaxilədə ittiham edib. Kremlin mövqeyinə görə, bölgədəki bütün problemlərin yeganə səbəbkarı Qərbdir. Belə çıxır ki, Rusiya özü “süddən çıxmış ağ qaşıqdır”.
Rusiyanın bölgədəki proseslərə yanaşması barədə Crossmedia.az-a danışan Azərbaycanın sabiq xarici işlər naziri, politoloq Tofiq Zülfüqarov bildirib ki, Zəngəzur dəhlizi regionda yerləşən bütün dövlətlərə fayda gətirə biləcək bir layihədir: “Amma biz görürük ki, hansısa siyasi oyunlar nəticəsində buna müəyyən əngəllər törədilir. Daha doğrusu, Ermənistan bizi qane etməyən təkliflər irəli sürür. Məqsədimiz Azərbaycanın bir hissəsindən digər hissəsinə gediş-gəliş sərbəst təmin etmək və vaxtilə bizə yönəlmiş bolşevik ədalətsizliyini qismən olsa da aradan götürməkdir. Bu baxımdan sözügedən mövzuda hər bir ölkənin maraqları var. Odur ki, Rusiya da dəhlizin açılmasında maraqlıdır".
Politoloq İranın Zəngəzur dəhlizinə olan münasibətindən də danışıb: "Regionun digər dövləti olan İranın bəzi siyasi qruplaşmaları qeyri-qanuni, sanksiyadan kənar hansısa ixracı təmin etmək üçün Ermənistana üz tutub və görsənir ki, orada özləri üçün şərait yaradıblar. Amma bəllidir ki, bu nəqliyyat yolunun bərpası onun xeyrinə olacaq. Çünki vaxtilə İranın Şimal-Cənub dəhlizi deyilən bir layihəsi var idi və çox aktual idi. Lakin mümkün olmadı. Amma heç bir vəsait tələb etmədən köhnə yolun bərpa edilməsi İranın xeyrinə olacaq. İran dövlətinin maraqları bu yolların açılması yönündədir. Lakin bəzi qruplaşmalar bunun qarşısının alınmasına çalışırlar".
Ayhan Ağarzayev
14:26 16.01.2025
Oxunuş sayı: 3408
