Ceyhun Kərəmov: "Yeni peşə təhsil müəssisələrinin yaradılması istiqamətində ciddi işlər görülür"
Son illərdə ölkəmizdə yeni peşə təhsil müəssisələrinin yaradılması və mövcud olanların modernləşdirilməsi istiqamətində ciddi işlər görülür. Bakı, Gəncə, Bərdə, Qəbələ, İsmayıllı, Cəlilabad və digər bölgələrdə yeni tikilib istifadəyə verilmiş peşə təhsil müəssisələri mövcuddur.
Crossmedia.az xəbər verir ki, bunu Peşə Təhsili üzrə Dövlət Agentliyinin direktoru Ceyhun Kərəmov “Tikinti sektoru üzrə kadr hazırlığında dövlət-özəl tərəfdaşlığının rolu” mövzusunda keçirilən tədbirdə deyib.
O bildirib ki, Quba, Qax, Tovuz kimi rayonlarla yanaşı, Qarabağ bölgəsində də - Füzuli, Şuşa, Qubadlı, Ağdam və Zəngilan kimi ərazilərdə yeni peşə təhsil müəssisələrinin layihələndirilməsi və tikintisi davam edir: “Bu infrastruktur, təkcə təhsil deyil, həm də regionların sosial-iqtisadi inkişafına xidmət edir. Peşə təhsili sisteminin dayanıqlılığı və əmək bazarının tələblərinə uyğunluğu dövlət və özəl sektorun əməkdaşlığından asılıdır. Müasir dövrdə əmək bazarının tələblərinə cavab verən kadrların hazırlanması üçün sənaye sektorunun tələbləri ilə təhsil sistemi arasında sıx koordinasiya təmin olunmalıdır. Təhsil bazarı və əmək bazarı arasında əlaqənin gücləndirilməsi zəruridir. Bu, dəyişən iqtisadi mühitdə təhsilin çevikliyini və effektivliyini təmin edir”.
Ceyhun Kərəmov bildirib ki, əmək bazarının sürətlə dəyişən tələbləri təhsil sisteminə də yeni yanaşma tələb edir: “Təhsil proqramlarının müasir standartlara uyğunlaşdırılması vacibdir. Bu prosesdə işəgötürənlərin iştirakı ilə tədris proqramları yenilənməlidir. Müəllimlərin və məktəb idarəçilərinin dəyişən tələblərə uyğun olaraq peşəkar inkişafı təmin edilməlidir. Biz bu dəyişikliklərə cavab verə bilirikmi? Cavab verə bilmiriksə, nə etməliyik? sualları təhsil sisteminin davamlı olaraq özünü təkmilləşdirməsinə yol açır”.
08:34 14.01.2025
Oxunuş sayı: 6036
