Böyük Britaniya hökuməti Aİ ilə sərbəst hərəkətə dair referendum təklifindən geri çəkilir
Böyük Britaniyanın Baş naziri Endi Börnhamın Avropa İttifaqı ilə sərbəst hərəkətin bərpası məsələsində referendum keçirilə biləcəyi barədə açıqlamasından sonra hökumət mövqeyinə aydınlıq gətirib.
Crossmedia.az xəbər verir ki, bu barədə BBC məlumat yayıb.
Baş nazir daha əvvəl Aİ ilə sərbəst hərəkətin referendum keçirilmədən bərpa olunmasının mümkün olub-olmadığı barədə suala “xeyr” cavabını verib. Lakin hökumət nümayəndələri bu məsələ ilə bağlı hələ heç bir qərarın qəbul edilmədiyini bildiriblər.
Baş nazirin müavini qeyd edib ki, hökumət ictimaiyyətlə məsləhətləşmələrin formasını əvvəlcədən müəyyənləşdirmək niyyətində deyil. Onun sözlərinə görə, Börnham hazırkı “Brexit” razılaşmasını qənaətbəxş hesab etmir və ilk növbədə bu məsələ ilə bağlı cəmiyyətlə müzakirələr aparmaq istəyir.
Börnham Böyük Britaniyanın Avropa İttifaqı ilə münasibətlərində əsaslı dəyişikliklərin növbəti parlament seçkilərinədək baş verməyəcəyini bildirib. O, həmçinin Leyboristlər Partiyasının 2024-cü il seçki manifestində yer alan sərbəst hərəkətə qayıdışın, vahid bazara üzvlüyün və gömrük ittifaqına qoşulmanın rədd edilməsi mövqeyinə sadiq olduğunu vurğulayıb.
Aİ-də sərbəst hərəkət prinsipi üzv ölkələrin vətəndaşlarına digər üzv dövlətlərdə yaşamaq, işləmək və təhsil almaq imkanı verir. Bu prinsip vahid bazara üzvlüyün əsas şərtlərindən biridir.
Mühafizəkarlar Partiyası və “Reform UK” sərbəst hərəkətin bərpasına qarşı çıxır. Liberal Demokratlar isə bu addımın iqtisadi artıma kömək edə biləcəyini bildirirlər.
Börnhamın noyabrın 20-də Brüsseldə keçiriləcək sammitdə iştirak etməsi gözlənilir. “Reform UK” lideri Naycel Faraj isə Aİ ilə münasibətlərdə hər hansı dəyişiklik barədə qərarın seçkilər vasitəsilə ictimai mandat əsasında verilməli olduğunu bildirib.
23:49 26.10.2026
Oxunuş sayı: 75
