Xarici xəbərlər
Lavrov İrana səfər edəcək
Rusiyanın xarici işlər naziri Sergey Lavrov bazar ertəsi İranın paytaxtı Tehrana səfər edəcək.
Crossmedia.az İranın dövlət televiziyası IRIB-ə istinadən xəbər verir ki, səfər çərçivəsində iki ölkə arasında ikitərəfli münasibətlər, regional və beynəlxalq məsələlər müzakirə olunacaq.
İran Xarici İşlər Nazirliyinin sözçüsü İsmayıl Bəqai bildirib ki, Lavrovun səfər zamanı İran Prezidenti Məsud Pezeşkianla da görüşü gözlənilir.
Onun sözlərinə görə, səfər iki ölkə arasında davam edən siyasi məsləhətləşmələr və əldə olunmuş razılaşmaların icrasına nəzarət məqsədi daşıyır.
Qeyd edək ki, son illərdə Qərbin tətbiq etdiyi sanksiyalar fonunda Rusiya və İran siyasi, iqtisadi və hərbi sahələrdə əməkdaşlığı genişləndiriblər.
2025-ci ilin yanvarında Rusiya Prezidenti Vladimir Putin və İran Prezidenti Məsud Pezeşkian Moskvada 20 illik Hərtərəfli Strateji Tərəfdaşlıq Müqaviləsi imzalayıblar.
Sənəd müdafiə, təhlükəsizlik, energetika, ticarət və nəqliyyat sahələrində əməkdaşlığı, eləcə də regional və beynəlxalq məsələlər üzrə koordinasiyanın gücləndirilməsini nəzərdə tutur.
Bununla belə, müqavilədə tərəflərin bir-birini hərbi cəhətdən müdafiə etməsinə dair qarşılıqlı öhdəlik müəyyən edilməyib.
13:02 19.10.2026
Oxunuş sayı: 58
