Diplomatik korpusun 22-ci Qarabağ səfəri - bərpa edilən Şərqi Zəngəzur
Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura iki günlük səfəri başlayıb. 58 ölkə və 9 beynəlxalq təşkilatı təmsil edən 150 nəfərlik nümayəndə heyətinin iştirak etdiyi səfər çərçivəsində Xankəndi, Şuşa, Ağdərə və Kəlbəcərdə həyata keçirilən bərpa-quruculuq işləri, sosial və iqtisadi infrastruktur layihələri, eləcə də tarixi-mədəni irsin qorunması və bərpası ilə bağlı görülən tədbirlər yerində nümayiş etdirilir.
Diplomatik korpus nümayəndələrinin işğaldan azad edilmiş ərazilərə budəfəki səfəri 2020-ci ildən etibarən sayca 22-cidir. Səfərin məqsədi beynəlxalq nümayəndələrin regionda aparılan genişmiqyaslı quruculuq prosesini, yeni infrastruktur layihələrini və ərazilərin inkişaf istiqamətlərini birbaşa yerində görməsi baxımından diqqət çəkir.
Milli Məclisin deputatı Tural Gəncəliyev Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura səfərinin əhəmiyyətini Crossmedia.az-a açıqlamasında dəyərləndirib: “Bu səfərin önəmi ondan ibarətdir ki, bütün dünya öz diplomatlarının gözü ilə Qarabağda baş verən transformasiyanı görür və Azərbaycanın qısa bir vaxt ərzində yaratdığı xariqələrə şahidlik edir. Biz demək olar ki, heç bir ölkənin maliyyə dəstəyi və köməyi olmadan Qarabağ və Şərqi Zəngəzuru öz gücümüz, öz resurslarımız hesabına intensiv sürətlə bərpa edirik”.
Deputatın sözlərinə görə, Azərbaycanın həyata keçirdiyi yenidənqurma işləri ölkəyə qarşı düşmənçilik mövqeyində olan dairələrin gözləntilərini də alt-üst edir: “Onlar Qarabağı, Şərqi Zəngəzuru yerlə-yeksan edəndə fikirləşirdilər ki, bu ərazilər onilliklər boyu belə dağıntılı vəziyyətdə qalacaq, heç vaxt oranı bərpa eləyə bilməyəcəyik. Elə ona görə də orada 1 milyondan çox mina basdırmalarının səbəbi də ondan ibarət idi ki, bu minaların təmizlənməsi onilliklər çəkəcək. Ancaq hər dəfə Azərbaycanın belə sürətli, intensiv şəkildə istər yenidənqurma-bərpa işləri, istərsə də bunun dünyaya tanıdılması, diplomatların ora səfərləri böyük fərqləri göstərir. Diplomatlar, beynəlxalq təşkilatlar və onların nümayəndələri bunu öz gözləri ilə görürlər”.
Tural Gəncəliyev vurğulayıb ki, Qarabağdakı bərpa prosesi digər müharibələrdən sonra aparılan yenidənqurma işləri ilə müqayisədə Azərbaycanın gördüyü işlərin miqyasını göstərir: “İkinci Dünya Müharibəsindən sonra Avropa şəhərlərinin, məhv olmuş Avropa qitəsinin onilliklər boyu bərpa edildiyini və hətta özlərinin hesabına yox, Amerikanın Marşal planı çərçivəsində ABŞ-nin ayırdığı vəsait hesabına bərpa edildiyini xatırlayırsınız. Bu gün Rusiya-Ukrayna müharibəsi, Yaxın Şərqdə və Fələstində olan dağıntılar, İsrailin İranla müharibəsi və digər hadisələr fonunda gözümüzün qabağında şəhərlər məhv olur. Ancaq biz çox xoşbəxtik ki, torpaqlarımızı işğaldan azad etdik. İşğaldan azad etməklə kifayətlənmədik, tez bir zamanda torpaqlarımızı bərpa etdik, camaat öz evinə-eşiyinə qayıdır”.
Nigar Xəlilli
14:30 11.09.2026
Oxunuş sayı: 47
