Səlcuq Bayraktar: Süni intellekt sahəsində qlobal monopoliyalar bəşəriyyətin resurslarını nəzarətə almağa çalışır
Türkiyənin tanınmış texnologiya sahibkarı Səlcuq Bayraktar süni intellekt texnologiyalarının inkişafı ilə bağlı diqqətçəkən açıqlamalar verib.
Crossmedia.az bu barədə xarici mediaya istinadən xəbər verir.
Bayraktar bildirib ki, süni intellekt sahəsində hegemonluq yaratmağa çalışan qlobal texnologiya nəhəngləri bu texnologiyanı nəzarət altına almağa çalışırlar.
Bayraktarın sözlərinə görə, bu şirkətlərin məqsədləri nəhəng hesablama gücü tələb edir və bu, gələcəkdə bəşəriyyətin enerji resurslarının böyük hissəsinin sərf olunmasına səbəb ola bilər.
O, bu ambisiyaları qədim Misir fironlarının öz şöhrətlərini əbədiləşdirmək üçün inşa etdirdikləri piramidalarla müqayisə edib. Bayraktar qeyd edib ki, bu gün qlobal texnologiya şirkətləri yüz minlərlə prosessor vasitəsilə insanların məlumatlarını toplayaraq qeyri-mütənasib güc əldə edirlər.
Baykar rəhbəri vurğulayıb ki, ölkələr və şirkətlər mövcud qaydaları izləməklə kifayətlənməməli, gələcəyə yönəlmiş yeni yanaşmalar hazırlamalıdırlar. Onun fikrincə, Türkiyənin pilotsuz uçuş aparatları sahəsində əldə etdiyi uğurlar kimi, süni intellekt sahəsində də yeni paradiqma yaradacaq texnoloji sıçrayışlara ehtiyac var.
Bayraktar bildirib ki, əsas məqsəd başqalarının müəyyən etdiyi qaydaları izləmək deyil, innovativ yanaşmalarla gələcəyin texnologiyalarını formalaşdırmaq olmalıdır.
14:24 17.06.2026
Oxunuş sayı: 56
