Xarici xəbərlər

Moskva Ermənistandan idxala qoyulan məhdudiyyətlərin siyasi motivli olması iddialarını rədd edib

Rusiyaya Ermənistandan bəzi ərzaq məhsullarının idxalına tətbiq edilən məhdudiyyətlər siyasi səbəblərlə deyil, aşkar edilmiş pozuntularla əlaqədardır. Bu barədə Sergey Dankvert bildirib.

Crossmedia.az-ın xarici mediaya istinadən verdiyi xəbərə görə, Rosselxoznadzorun rəhbəri “Rossiyskaya qazeta”ya müsahibəsində deyib ki, məsələ siyasi müstəvidə deyil, uzun illər ərzində müəssisələrlə aparılan işin nəticələri, laborator araşdırmalar və qeydə alınan pozuntularla bağlıdır.

“Bizim müəssisələrlə əməkdaşlıq tariximiz, laborator tədqiqatların nəticələri, tədarüklər və aşkar edilmiş pozuntular barədə məlumatlarımız var”, – deyə Dankvert qeyd edib.

Onun sözlərinə görə, əsas problem istehsalçılar tərəfindən keyfiyyətə nəzarət mexanizmlərinin yetərincə effektiv olmamasıdır. İstehsal və məhsulun göndərilməsi mərhələləri arasında daxili nəzarət və koordinasiya kifayət qədər təmin edilmir.

Dankvert bildirib ki, minlərlə bağlama göyərti bir nəqliyyat vasitəsində toplanır və bundan sonra nəzarət orqanları çox böyük həcmdə məhsulu yoxlamalı olur. Onun sözlərinə görə, belə həcmdə məhsulun tam şəkildə yoxlanılması fiziki baxımdan mümkün deyil.

🖨 Çap et

13:04 17.06.2026

Oxunuş sayı: 51