Azərbaycan istehsalı olan benzin Ermənistanda daha ucuz qiymətə satışa çıxarılacaq
Erməni vəkil Raffi Aslanyanın verdiyi məlumata görə, Azərbaycandan idxal edilən Aİ-95 benzininin Ermənistanda satış qiyməti litr üçün 440 dram (təxminən 1,97 manat) olacaq.
Crossmedia.az bu barədə xəbər verir. Müqayisə üçün qeyd edək ki, hazırda Ermənistanın yanacaqdoldurma məntəqələrində Aİ-95 markalı benzinin qiyməti təxminən 520 dram (≈ 2,30 manat) təşkil edir. Bu isə yeni idxal olunacaq yanacağın yerli bazardakı analoji məhsuldan xeyli ucuz olacağını göstərir.
Eyni zamanda vurğulanır ki, Azərbaycanda “Premium” markalı benzin hazırda litr üçün 1,60 manata satılır. Bu fakt regionda yanacaq qiymətləri arasındakı fərqi və Azərbaycan məhsullarının rəqabət üstünlüyünü bir daha ortaya qoyur.
Ekspertlərin fikrincə, Azərbaycan benzininin Ermənistan bazarına daxil olması rəqabəti gücləndirə, eləcə də qiymətlərin mərhələli şəkildə aşağı düşməsinə təsir göstərə bilər. Enerji bazarında bu cür iqtisadi əməkdaşlıq isə siyasi gərginlik fonunda belə ticarətin alternativ dialoq vasitəsi ola biləcəyini göstərir.
Sevinc Yarməmmədova
16:55 22.12.2025
Oxunuş sayı: 1296
