Hüquq müdafiəçisindən amnistiya təşəbbüsünə görə Prezidentə minnətdarlıq :Təşəkkür edirik
Azərbaycan dövlətçiliyinin ən mühüm mərhələlərindən biri – suverenliyin tam bərpası və Konstitusiyanın ali hüquqi qüvvəsinin ölkənin bütün ərazilərində təmin olunması tarixi qələbə kimi xalqımızın yaddaşına həkk olunub. Bu qələbənin yaratdığı yeni siyasi-hüquqi reallıqlar fonunda humanizm, mərhəmət və hüquqi ədalət prinsiplərinə sadiqlik bir daha dövlət siyasətinin əsas istiqamətlərindən biri kimi ön plana çıxır.
Məhz bu ali dəyərləri rəhbər tutaraq, cəzadan azad etmənin tərbiyəvi və islahedici əhəmiyyətinə inanaraq, azadlığa buraxılacaq şəxslərin qanunlara hörmətlə yanaşacağına və cəmiyyətə faydalı vətəndaş kimi reinteqrasiya olunacağına ümid edərək Azərbaycan Respublikasının Prezidenti İlham Əliyev amnistiya elan edilməsi təşəbbüsü ilə çıxış edib.
Dövlət başçısının sözügedən humanist addımı ilə bağlı hüquq müdafiəçisi Novella Cəfərova Crossmedia.az-a açıqlama verib: "Doğrudan da, çox sevindiyim, çox vacib və əhəmiyyətli bir qərardır. Bu təşəbbüsə görə Prezidentə təşəkkür edirik. Həqiqətən də, bu qərar həm suverenlik baxımından, həm də Konstitusiyanın ruhuna uyğun olaraq böyük əhəmiyyət daşıyır. Uzun illərdir müxtəlif səbəblərdən cəza çəkən insanların yenidən Azərbaycanda ailələrinə qovuşması son dərəcə mühüm hadisədir. Söhbət iyirmi min nəfərdən gedir və bu, az rəqəm deyil. Bu, iyirmi min ailənin yenidən bir araya gəlməsi, sevinc yaşaması deməkdir. Bu qərar ailələr üçün çox böyük bir impuls olacaq — sevinc impulsu verəcək. Həm ailələrin daxilində, həm də cəmiyyətin ümumi ruhunda bu addımın təsiri hiss olunacaq. Həm Dünya Azərbaycanlılarının Həmrəyliyi Günü ərəfəsində, həm də Yeni il öncəsi bu ailələrin sevincinə mən də qoşuluram. Açıq şəkildə deyirəm: mən iyirmi min ailənin sevincinə qoşuluram və buna görə Prezidentə bir daha təşəkkürümü bildirirəm".
"Çox istərdim ki, bu qərarla bağlı kənardan, xarici tərəflərdən Azərbaycana qarşı söz-söhbətlər, əsassız iddialar olmasın. Bu əfv və amnistiya məsələsi bizim daxili işimizdir. Arzum odur ki, bu əfv və amnistiya daha geniş tətbiq olunsun. Bloqerlər, siyasi motivlərlə məsuliyyətə cəlb olunanlar, müharibədə iştirak etmiş şəxslər də bu əfv və amnistiya qərarlarına düşsünlər. Xüsusilə çox istərdim ki, 60 yaşından yuxarı olan şəxslər, cəzasının bitməsinə iki-üç il qalmış insanlar da azadlığa buraxılsınlar. Onlar artıq illərdir həbsdədirlər və cəzalarının böyük hissəsini çəkiblər. Bundan əlavə, Nardaran hadisələri ilə bağlı iyirmi ildən artıqdır həbsdə olan insanlar var — onların da bu əfv prosesinə daxil edilməsini çox istərdim. Eyni zamanda müharibədə iştirak etmiş və uzun illər cəza çəkmiş şəxslərin də azadlığa buraxılması vacibdir. Mən burada konkret olaraq bəzi adları da xatırladıram — məsələn, Əmir Aslanov kimi şəxslər. Demirəm hamısı, amma müharibədə iştirak etmiş, iyirmi ildən çox cəza çəkən iki-üç nəfər insanın da bu əfvə düşməsi cəmiyyət üçün çox mühüm addım olar. Həmçinin Tofiq Yavuzlu da müharibədə iştirak edib və onun da azadlığa çıxmasını istərdim", - o, əlavə edib.
Hüquq müdafiəçisi son olaraq əlavə edib ki, bundan başqa, müxtəlif siyasi partiyalardan olan şəxslərin də bu əfv və amnistiya qərarlarına düşməsini istəyirəm: "Qeyri-hökumət təşkilatlarındançox sayda insan həbs olunub — onların da azadlığa buraxılması vacibdir. Çox istəyirəm ki, bu il ölkəmiz üçün həmrəylik ili olsun, məhəbbət ili olsun. Biz elə bir Azərbaycan istəyirik ki, hamımız bir-birimizə sevgi ilə, anlayışla, məhəbbətlə yanaşaq. Elə bir dövlət olsun ki, cəmiyyət daxilində qarşıdurma yox, birlik olsun. Çünki biz bir-birimizə məhəbbətlə yanaşsaq, həmin dövlət də güclü olacaq, hakimiyyət də güclü olacaq. Mən ürəkdən istəyirəm ki, bu addımlar atılsın və bu addımlar hamımızın birliyinə, həmrəyliyinə xidmət etsin".
Ayhan
11:40 17.12.2025
Oxunuş sayı: 4285
