Qırğızıstanda Dünya Türk Dili Ailəsi Günü münasibətilə beynəlxalq konfrans keçirilib
Türk xalqlarının birliyini, mənəvi yaxınlığını və zəngin dil irsini simvolizə edən Dünya Türk Dili Ailəsi Günü münasibətilə Qırğızıstanın Yusup Balasağın adına Qırğız Milli Universitetində (KNU) “Türk xalqlarının dirçəlişində əcdad irsinin yaddaşı” mövzusunda beynəlxalq elmi-praktik konfrans keçirilib. Tədbir I Ümumittifaq Türkoloqlar Qurultayının 100 illiyinə həsr olunub.
Crossmedia.az xəbər verir ki, konfransın təşkilatçıları Y. Balasağın adına Qırğız Milli Universiteti və Qırğızıstanda azərbaycanlıların “Birlik” İctimai Birliyi, Qırğızıstan Xalqları Assambleyası və “Türk İrsi” Mərkəzi olub.
Xatırladaq ki, türkoloqların tarixdə ilk qurultayı 1926-cı ildə Bakı şəhərində keçirilib və bu mühüm hadisə türkologiyanın, dil siyasətinin və türk xalqları arasında elmi əməkdaşlığın inkişafında dönüş nöqtəsi olub. Bu baxımdan Qurultayın 100 illiyinin qeyd edilməsi Türk dünyasının ortaq elmi və mədəni yaddaşı üçün xüsusi əhəmiyyət daşıyır.
Konfransın işində Qırğızıstan, Türkiyə, Azərbaycan və Rusiya Federasiyasının Başqırdıstan Respublikasından olan aparıcı alimlər, türkoloqlar və mütəxəssislər iştirak ediblər. Bu da tədbirin beynəlxalq statusunu və bütün Türk dünyası üçün əhəmiyyətini bir daha təsdiqləyib.
Tədbirin əsas məqsədi Bakı şəhərində keçirilmiş Türkoloqlar Qurultayının 100 illiyinin qeyd olunması və onun tarixi əhəmiyyətinin dərk edilməsi, eləcə də türk xalqları arasında elmi, mədəni və humanitar əlaqələrin möhkəmləndirilməsi kimi müəyyənləşdirilib.
Konfrans çərçivəsində dil irsinin qorunması, tarixi yaddaş və türkoloji elmin müasir inkişaf istiqamətlərinə həsr olunmuş elmi məruzələr dinlənilib, fikir mübadiləsi aparılıb. Türk dillərinin zənginliyini və rəngarəngliyini əks etdirən mədəni çıxışlar tədbirə xüsusi ruh qatıb.
Qırğızıstandakı Azərbaycan diasporunun “Birlik” İctimai Birliyinin sədri Xansivar Baxşəliyev çıxış edərək vurğulayıb ki, türk xalqlarını dil, tarix və ortaq mədəni irs birləşdirir. O bildirib ki, bu cür elmi forumlar türk xalqlarının daha da yaxınlaşmasına, onların mənəvi dəyərlərinin qorunmasına və gələcək nəsillərə ötürülməsinə xidmət edir.
Tədbirin sonunda Xansıvar Baxşəliyev konfransın məruzəçilərinə və təşkilatçılarına təşəkkürnamələr təqdim edərək forumun yüksək elmi səviyyəsini və ictimai əhəmiyyətini qeyd edib.
16:50 16.12.2025
Oxunuş sayı: 1209
