Deputat TDT-nin gələcəyindən danışdı: "Oyunu dəyişdirən" faktor...
Azərbaycan və Türkiyə arasında çoxşaxəli strateji tərəfdaşlıq münasibətləri son illərdə daha da dərinləşib. Bu əməkdaşlığın mühüm istiqamətlərindən biri də Türk Dövlətləri Təşkilatı (TDT) çərçivəsində həyata keçirilən birgə fəaliyyətlərdir. TDT üzv dövlətlər arasında siyasi, iqtisadi, mədəni və təhlükəsizlik sahələrində inteqrasiyanın gücləndirilməsini hədəfləyən önəmli platformadır.
Azərbaycanın Türkiyədəki səfiri Rəşad Məmmədov Türkiyənin TDT-dəki daimi nümayəndəsi Ufuk Ekici ilə görüşərək təşkilat daxilində əməkdaşlığın daha da möhkəmləndirilməsi və ümumi məqsədlər uğrunda həmrəyliyin artırılması məsələlərini müzakirə edib.
Bu barədə Crossmedia.az-a danışan Milli Məclisin deputatı Tural Gəncəliyev bildirib ki, Azərbaycan və Türkiyənin TDT çərçivəsində və ümumiyyətlə əməkdaşlığının gücləndirilməsi regionda stabilləşdirici bir faktor deməkdir: "Türk dünyasının bünövrəsinin Azərbaycan və Türkiyə əməkdaşlığı ilə qoyulması təsadüfi deyil. Yadınıza salın, 2009-cu il Naxçıvanda imzalanmış sənəd TDT-nin tarixində yeni bir səhifə açdı və təşkilatın institusional inkişafında çox önəmli oldu – Naxçıvan sənədi”.
Deputat əlavə edib ki, bu gün TDT artıq mədəni, humanitar və "soft power" platformadan növbəti mərhələyə qədəm qoyur: "Burada vahid iqtisadi sistem, bazar, təhlükəsizlik və hərbi-siyasi əməkdaşlıq nəzərdə tutulur. Təsadüfi deyil ki, Türk Dövlətləri Təşkilatının sonuncu Qəbələ görüşündə Prezidentimiz vurğuladı ki, gələn il Azərbaycanda TDT-nin hərbi təlimləri keçiriləcək. Bu, yeni mərhələ, yeni konsepsiyadır”.
T.Gəncəliyev qeyd edib ki, bu, təşkilatın hərbi ittifaq olması demək deyil, sadəcə milli maraqlarımızı və təhlükəsizliyimizi qorumaq üçün vacibdir: "Gələcəkdə TDT böyük alyansa çevriləcək və çoxqütblü dünyada Azərbaycan-Türkiyə əməkdaşlığı nüvəsi ilə güclü müttəfiqlik yaradacaq. Bizim əməkdaşlığımız, ingilislərin dediyi kimi, "game changer"– oyunu dəyişən bir faktor olacaq və TDT qlobal səviyyədə hesablaşılacaq güc mərkəzi kimi formalaşacaq”.
Mehriban Yariyeva
16:15 18.10.2025
Oxunuş sayı: 2644
