Deputat: Əmək qabiliyyətinin itirilmə dərəcəsiylə əlaqədar vahid mexanizm uğurlu təcrübə olacaq
Layihə əmək fəaliyyəti zamanı xəsarət alan və ya peşə xəstəliyinə məruz qalan vətəndaşlarımızın sosial ədalət və dövlət qarşısında təminat hüququnu qorumağa yönəlib.
Crossmedia.az xəbər verir ki, bunu Milli Məclisin Əmək və sosial siyasət komitəsinin bu gün keçirilən iclasında “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” qanuna təklif edilən dəyişikliyin müzakirəsi zamanı deputat Nigar Məmmədova bildirib.
Deputat deyib ki, peşə əmək qabiliyyətinin itirilmə dərəcəsinin müəyyən edilməsi üçün vahid və aydın mexanizmin yaradılması uğurlu təcrübə olacaq: “Uzun illər bu sahədə mövcud olan bəzi boşluqlar tibbi komissiyalar, sığorta şirkətləri və məhkəmələr arasında fərqli yanaşmalara səbəb olurdu. Yeni qanun bu ziddiyyətləri aradan qaldıracaq. Artıq bu sahədə vahid qaydanın Nazirlər Kabineti tərəfindən təsdiqlənməsi hüquqi müəyyənliklə yanaşı, çevikliyi təmin edəcək. Gələcəkdə tibbi və sosial meyarlar dəyişərsə, həmin qaydaları operativ şəkildə yeniləmək mümkün olacaq. Hüquqi, tibbi və sosial aspektlərin birləşməsi məsələyə kompleks yanaşmanın göstəricisidir. İkinci mühüm məqam qurumlararası əməkdaşlıqdır. Digər, amma çox vacib məqam isə ictimai etimadın möhkəmlənməsidir. Bu qanun layihəsi işçi, işəgötürən və dövlət arasında qarşılıqlı etimadı artırır. Əmək qabiliyyətinin obyektiv və şəffaf qaydada qiymətləndirilməsi vətəndaşın özünü yüksək səviyyədə müdafiədə hiss etməsi deməkdir. Bu, həm də mübahisələrin azalmasına, sosial sabitliyin möhkəmlənməsinə səbəb olacaq. Qanun layihəsinin mühüm üstünlüklərindən biri də onun maliyyə baxımından səmərəliliyidir. Sosialyönümlü layihələrin hazırlanmasında dövlət qurumları ilə yanaşı müstəqil ekspertlərin və həmkarlar ittifaqlarının iştirakının təmin olunması hər zaman müsbət nəticələr verir. Eyni təcrübənin Nazirlər Kabineti tərəfindən hazırlanacaq qaydalarda da tətbiq olunması prosedurun şəffaflığını və obyektivliyini daha da artırar. Həmçinin prosesin rəqəmsallaşdırılması da vacibdir. Belə ki, tibbi rəy və qərarların vahid elektron bazasının yaradılması, nəticələrin izlənməsi imkanları həm şəffaflığı, həm də vətəndaş rahatlığını təmin etməklə prosesi daha da təkmilləşdirəcək”.
Nigar Məmmədova qeyd edib ki, işəgötürən üçün balanslaşdırılmış məsuliyyət də əsas məsələlərdən biridir: “Əgər işəgötürən qanunla müəyyən olunmuş sığorta öhdəliklərini yerinə yetirirsə, o, məhkəmə iddialarından qorunur. Yəni, həm işçi kompensasiya ilə təmin olunur, həm də işəgötürən hüquqi cəhətdən müdafiə olunur. Nəticə etibarı ilə bu qanun layihəsi sosial sığorta sistemimizi daha müasir, şəffaf və vətəndaşyönümlü edir. Eyni zamanda vətəndaşların hüquqlarını qoruyur, dövlət orqanlarının fəaliyyətini daha təkmilləşdirir”.
14:42 16.10.2025
Oxunuş sayı: 2238
