Xocalıda məskunlaşmanın həyata keçirilməsi eyni zamanda mənəvi dəyər daşıyan bir prosesdir - Deputat
Azad edilmiş torpaqlarda həyata keçirilən genişmiqyaslı bərpa və yenidənqurma tədbirləri nəticəsində doğma yurdlarına qayıdan ailələrin sayı günü-gündən artır. Qarabağda həyatın yenidən canlanması, dağıdılmış kəndlərin müasir tələblərə uyğun şəkildə bərpası artıq reallığa çevrilib. Növbəti köç mərhələsi çərçivəsində Xocalı rayonunun Təzəbinə və Ballıca kəndlərinə sakinlərin qayıdışı bu prosesin ardıcıl və planlı şəkildə davam etdiyini göstərir. Bu, həm dövlətin həyata keçirdiyi “Böyük Qayıdış” siyasətinin uğurlu nəticəsidir, həm də illərlə doğma torpaqlarına həsrət qalan insanların həyatında yeni bir mərhələnin başlanğıcıdır.
Məskunlaşma proqramları yalnız yaşayış üçün şəraitin yaradılması ilə məhdudlaşmır; bu, həm də Qarabağın və Şərqi Zəngəzurun iqtisadi, sosial və mədəni potensialının dirçəldilməsini, bölgənin ümummilli inkişaf modelinə inteqrasiyasını hədəfləyir. Hər bir yeni ev, hər bir tikilən məktəb, hər bir salınan yol bu torpaqlarda həyatın qalıcı dönüşünün, ədalətin və suverenliyin bərpasının rəmzinə çevrilir.
Bu baxımdan Qarabağda və Şərqi Zəngəzurda həyata keçirilən məskunlaşma prosesi Azərbaycanın dövlət siyasətində strateji prioritet olmaqla yanaşı, həm də xalqın öz tarixi yaddaşına və milli kimliyinə sadiqliyinin bariz göstəricisidir.
Məsələ ilə bağlı Crossmedia.az-a açıqlama verən Milli Məclisin deputatı Vüqar Bayramov Xocalı rayonunun Təzəbinə və Ballıca kəndlərinə sakinlərin qayıdışı, intensiv məskunlaşma prosesinin davam etdiyini bildirib: "Bir tərəfdən, biz daha çox vətəndaşımızın xüsusilə də keçmiş məcburi köçkünlərin öz ata-baba yurdlarına qayıtmasının şahidi oluruq. Digər tərəfdən, Qarabağ iqtisadiyyatının inkişafı ilə əlaqədar olaraq həmin ərazilərdə fəaliyyət göstərən vətəndaşların sayında da artım müşahidə edilir.
Hazırda işğaldan azad olunmuş ərazilərimizdə 50 mindən çox vətəndaşımız yaşayır və işləyir. Onlardan 17 mindən çoxu keçmiş məcburi köçkünlərdir. İlin sonuna qədər bu rəqəmin 140 min nəfərə çatacağı gözlənilir. Bu fakt, azad edilmiş ərazilərdə məskunlaşma prosesinin kifayət qədər sürətlə və planlı şəkildə həyata keçirildiyini göstərir.
Xocalı Azərbaycanın ən həssas şəhərlərindən biridir. Tariximizdə faciəvi soyqırımın məhz bu şəhərdə baş verməsi Xocalını həm mənəvi, həm də simvolik baxımdan xüsusi əhəmiyyətə malik edir. Buna görə də Xocalıda məskunlaşmanın həyata keçirilməsi təkcə sosial-iqtisadi deyil, eyni zamanda mənəvi dəyər daşıyan bir prosesdir".
Deputat həmçinin məskunlaşmanın bütün işğaldan azad olunmuş yaşayış məntəqələrini əhatə etdiyini və bu prosesin yaxın illərdə də eyni intensivliklə davam etdiriləcəyini qeyd edib: "Cənab Prezidentin rəhbərliyi ilə keçmiş məcburi köçkünlərin öz doğma torpaqlarına qayıdışı dövlət siyasətinin prioritet istiqamətlərindən biri kimi həyata keçirilir".
Elmir Heydərli
21:06 10.10.2025
Oxunuş sayı: 5235
