İlham Əliyev əsl dövlət adamına məxsus səbir, təmkin və duruş nümayiş etdirdi - Deputat
Rusiya Prezidenti Vladimir Putinin Düşənbədə Azərbaycan Prezidenti İlham Əliyevlə görüşündə səsləndirdiyi bəyanat iki ölkə arasında mövcud strateji tərəfdaşlığın və qarşılıqlı etimadın bariz nümunəsidir. Putin bildirib ki, Rusiya AZAL təyyarəsinin qəzaya uğraması ilə bağlı aparılan araşdırmalarda hərtərəfli əməkdaşlığı təmin edir və istintaqın yekunlaşmaq üzrə olduğunu vurğulayıb. Bu açıqlama həm faciənin obyektiv şəkildə araşdırılmasına, həm də Rusiya–Azərbaycan münasibətlərinin qarşılıqlı dəstək və şəffaflıq prinsiplərinə əsaslandığını göstərir.
Mövzu ilə bağlı Milli Məclisin deputatı Nəsib Məhəməliyev Crossmedia.az-a bildirib ki, Azərbaycan və Rusiya prezidentləri İlham Əliyev və Vladimir Putinin Düşənbədə MDB dövlət başçıları sammiti çərçivəsində baş tutan görüşü, hər iki ölkə arasındakı gərginliyin aradan qaldırılmasına xidmət edəcək: “Məlum təyyarə hadisəsindən sonra keçən müddətdə şimal qonşumuzun bəzi siyasətçiləri, politoloqları və kütləvi informasiya vasitələri tərəfindən ölkəmizə qarşı təxribat xarakterli bəyanatlar və çıxışlar səsləndirildi. Orada yaşayan soydaşlarımıza və diaspora fəallarına qarşı qanunsuz davranışlar sərgiləndi. Təbii ki, belə hərəkətlər dostluq və qonşuluq prinsipləri ilə uzlaşmır. Əksinə, qarşılıqlı etimad mühitinə xələl gətirir".
Deputatın sözlərinə görə, görüşdə Prezident Putinin verdiyi izahat, zərərçəkənlərə və dövlətə dəymiş ziyanın kompensasiya ediləcəyi, günahkar şəxslərin cəzalandırılacağı barədə söylədikləri, Rusiya tərəfindən faktiki etiraf kimi dəyərləndirilə bilər: “Hesab edirəm ki, dünənki görüş olduqca vacib idi və Azərbaycan diplomatiyasının növbəti qələbəsi kimi qiymətləndirilməlidir".
Millət vəkili həmçinin Prezident İlham Əliyevin hadisədən sonrakı davranışlarını xüsusi vurğulayıb: “Ötən 9 ay ərzində çoxsaylı təzyiqlərə, böhtanlara, şantajlara baxmayaraq, cənab Prezident əsl dövlət adamına məxsus səbir, təmkin və duruş nümayiş etdirdi. Yaranmış vəziyyətdən məharətlə istifadə etdi və Vaşinqton deklarasiyasına, eləcə də Avropa İttifaqı ilə münasibətləri keyfiyyətcə yeni müstəviyə çıxardı. Rusiya bütün bunları görür və Azərbaycanla münasibətlərdə buraxdığı nöqsanların daha çox özünə zərər verdiyinin fərqindədir. Etiraf edək ki, əvvəllər hadisələrin belə gedişatını heç kim təsəvvür edə bilməzdi".
Sonda deputat qeyd edib ki, qarşılıqlı etimadın tam bərpa olunması müəyyən zaman tələb etsə də, prosesin müsbət istiqamətdə inkişaf etdiyi aydın görünür: “İstənilən halda, etimad mühiti getdikcə güclənəcək və bu, regionda sabitliyin möhkəmlənməsinə xidmət edəcək".
Mehriban Yariyeva
19:19 10.10.2025
Oxunuş sayı: 18052
