Putin: Azərbaycanla münasibətlərdə böhran deyil, emosional gərginlik yaşanıb
Rusiya Prezidenti Vladimir Putinin Düşənbədə Azərbaycan Prezidenti İlham Əliyevlə görüşündə Bakı–Moskva məsələlərinə aydınlıq gətirib. Putin iki ölkə arasında münasibətlərin heç vaxt böhran səviyyəsinə çatmadığını bildirib. Onun sözlərinə görə, əgər bu, doğrudan da dövlətlərarası böhran olsaydı, iki ölkə arasında ticarət-iqtisadi əlaqələrdə artım müşahidə olunmazdı. “Biz nə qədər çətinliklərlə üzləşsək də, iqtisadi əlaqələr artmağa davam etdi. Bu halda buna necə dövlətlərarası münasibətlərin böhranı demək olar?” — deyə Putin qeyd edib.
Crossmedia.az bildirir ki, dövlət başçısı hadisəni daha çox “emosional böhran” adlandırıb. Onun sözlərinə görə, bu gərginliyin səbəbi təyyarə qəzası və sərnişinlərin faciəli şəkildə həlak olması idi. “Sakit şəkildə araşdırmaq lazım idi. Bizə məsələni başa düşmək, bütün detalların üzə çıxması üçün vaxt lazım idi. Çox mürəkkəb texniki ekspertizalar aparılmalı idi — bu, böyük peşəkarlıq tələb edən bir işdir”
Prezident bildirib ki, istintaq obyektiv aparılıb, bu prosesə Beynəlxalq Aviasiya Komitəsi də qoşulub. “Hazırda istintaq yekunlaşmaq üzrədir, ümumi mənzərə aydındır. Dünən Azərbaycan Prezidenti ilə bu barədə danışdıq və ümid edirəm ki, bu səhifəni çevirdik”.
Putin həmçinin qeyd edib ki, Azərbaycanla iki ölkə arasında dostluq münasibətlərinin dərin köklərə malik olduğunu göstərir. “Mən çox ümid edirəm ki, gələcəkdə də bu münasibətlər uğurla inkişaf edəcək. Emosiyalar təbiidir, amma onları elə idarə etmək lazımdır ki, işə mane olmasın”.
Mehriban Yariyeva
19:01 10.10.2025
Oxunuş sayı: 4960
