Hadrut əməliyyatının sirləri: Azərbaycan ordusunun “Xəncər zərbəsi’’
Bu gün Azərbaycanın yaxın tarixində qürurla xatırlanan günlərdən biridir – Hadrut qəsəbəsinin işğaldan azad edildiyi gün. 2020-ci il oktyabrın 9-da Azərbaycan Ordusu qəhrəmanlıq və mərdlik nümunəsi göstərərək Hadrutu düşmən tapdağından azad etdi. Bu hadisə Vətən müharibəsində strateji və mənəvi baxımdan mühüm dönüş nöqtəsinə çevrildi. Hadrutun azad olunması 44 günlük müharibənin gedişinə hansı strateji təsiri göstərdi?
Hərbi ekspert Azad İsazadə bu barədə Crossmedia.az-a danışıb. O, bildirib ki, Hadrut əməliyyatı ümumilikdə bütün müharibənin gedişinə mühüm əhəmiyyət göstərdi: ‘’Nə əhali, nə də regionda aparıcı dövlətlər bu əməliyyatın bu cür keçiriləcəyini gözləyirdi. Azərbaycan hələ Füzulini, Ağdamı tam azad eləməmiş birdən-birə Dağlıq Qarabağ ərazisinə girdi və Hadrutu azad elədi. Sözsüz ki, bu əməliyyat bütün müharibənin gedişinə ciddi təsir göstərdi. Biz Birinci Qarabağ müharibəsində Hadrutu azad edə bilmədik, ətraf ərazilərdə döyüşlər getsə də, şəhərin özündə real döyüşlər getmirdi. Lakin, 44 günlük müharibə zamanı Azərbaycan qəflətən “Xəncər zərbəsi’’ ilə Qarabağın dağlıq zonasına girməyə və strateji əhəmiyyəti olan Hadrutun azad edilməsinə nail oldu. Hadrut əməliyyatından sonra Ermənistan Silahlı Qüvvələri bəzən məntiqsiz və strateji əhəmiyyəti olmayan hərəkətlər edirdi. Ona görə də bizim ordumuzun səyi nəticəsində digər rayonlarımız azad olunmamış Şuşa istiqamətində irəliləməyə nail olduq. Sözsüz ki, bu elə də asan deyildi. Ordumuz itki verməyinə baxmayaraq, hər gün hansısa kənd, yaşayış yerləri işğaldan azad olunurdu’’.
Ekspert qeyd edib ki, Hadrut əməliyyatı tarixə düşəcək və bu əməliyyatla bağlı hər bir azərbaycanlı fəxr edəcək: ‘’Müharibənin regionda vəziyyətin dəyişməsinə gəldikdə isə, İkinci Qarabağ müharibəsinə qədər biz məğlub dövlətin vətəndaşları idik. Ermənilər özlərini inandırmışdılar ki, biz onlar üzərində qələbə çala bilməyəcəyik. Lakin, İkinci Qarabağ müharibəsi regionda prinsipal dəyişiklikləri gətirdi. Azərbaycan regionda mühüm qüvvə nümayiş etdirən ölkə kimi özünü göstərdi və regionda öz sözünü yeritməyə başladı. Bu gün Cənubi Qafqazda təhlükəsizliyi təmin edən dövlət varsa, o da Azərbaycandır. Ermənilər hələ buna pessimist baxırlar, amma, anlamalıdırlar ki, bu gün onların təhlükəsizliyini də təmin edən bizik. Gələcəkdə öz siyasətini bunun üzərində qursalar regionda uzunmüddətli sülh yarana bilər. Yalnız hərbi yox, eyni zamanda, iqtisadi, kommunikasiya təhlükəsizliyi”.
Sevinc Yarməmmədova
22:37 09.10.2025
Oxunuş sayı: 7033
