“Zəngəzur dəhlizinin açılması real və qaçılmaz prosesə çevrilib”- Rəy
Prezident İlham Əliyev Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşündə çıxışında bildirib ki, Azərbaycanla Ermənistan arasında sülh sazişinin paraflanması Cənubi Qafqazı sülh məkanına çevirəcək.
Dövlət başçısı qeyd edib ki, Vaşinqton Zirvəsi çərçivəsində ATƏT-in Minsk qrupunun və əlaqədar strukturların bağlanması üçün edilmiş birgə müraciətə uyğun olaraq, sentyabrın 1-də ATƏT tərəfindən qəbul edilmiş qərarla keçmiş münaqişənin bu qalıqları da aradan qaldırılıb.
Vətəndaş Partiyasının sədri Sabir Rüstəmxanlı dövlət başçısının səsləndirdiyi fikirlər barədə Crossmedia.az-a danışıb: “Ermənistan–Azərbaycan münasibətlərinin birinci mərhələsi – yəni Azərbaycan torpaqlarının işğaldan azad edilməsi – artıq başa çatıb. Bu mərhələdən sonra regionda diqqət mərkəzinə Zəngəzur dəhlizi çıxır. İkinci mərhələ kimi qiymətləndirilən bu proses Azərbaycanla Naxçıvanı birləşdirəcək və Böyük Azərbaycanın iqtisadi-siyasi bütövlüyünə mühüm töhfə verəcək”.
S.Rüstəmxanlı bildirir ki, Zəngəzur dəhlizi hələ Sovet dövründə aktiv olub. Onun sözlərinə görə, həmin illərdə bu istiqamətdə həm dəmir yolu xətləri, həm də asfalt yollar mövcud idi.
Siyasətçi qeyd edib ki, ABŞ-da bağlanan son müqavilədən sonra, Ermənistanın mövqeyindən asılı olmayaraq, Zəngəzur dəhlizinin açılması real və qaçılmaz prosesə çevrilib: “Dəhlizin açılması Cənubi Qafqazda yeni iqtisadi əməkdaşlıq mühiti formalaşdıracaq, region ölkələrinin nəqliyyat və ticarət əlaqələrini gücləndirəcək və dayanıqlı sülhün təmininə şərait yaradacaq”.
Mehriban İbrahimli
23:15 07.10.2025
Oxunuş sayı: 6989
