Səmərqənd Dövlət Universitetinin nümayəndəsi: “Azərbaycan universitetləri ilə əməkdaşlıqda maraqlıyıq”
Səmərqənd Dövlət Universitetinin nümayəndəsi Şahram Aslonov, Bakıda keçirilən Özbəkistan universitetlərinin sərgisi çərçivəsində universitetin fəaliyyəti və gələcək əməkdaşlıq planlarından danışıb.
Bu barədə o, Crossmedia.az-a açıqlamasında bildirib.
“Universitetimiz əsasən xarici dillərin tədrisi üzrə ixtisaslaşır. Bizdə 16-dan çox dil üzrə proqram mövcuddur – ərəb, çin, ingilis, fransız və digər Avropa dilləri. Universitetimizdə İtaliya, Fransa, Çin və Yaponiya kimi ölkələrdən olan çox sayda xarici tələbə təhsil alır. Hazırda 200-dən çox beynəlxalq ali təhsil müəssisəsi ilə əməkdaşlıq müqavilələrimiz mövcuddur,” – deyə o bildirib.
Sərgi ilə bağlı təəssüratlarını bölüşən Ş.Aslonov tədbirin yüksək səviyyədə təşkil olunduğunu qeyd edib və təşkilatçılara təşəkkürünü bildirib.
Azərbaycanla əməkdaşlıqla bağlı sualı cavablandıran nümayəndə vurğulayıb ki, Bakı Dövlət Universiteti ilə yanaşı, Azərbaycan Dillər Universiteti və İngla School Baku ilə də əməkdaşlıq qurmaq niyyətindədirlər: “Əgər mümkün olsa, İngla School Baku ilə əməkdaşlıq qurmaq istəyirik ki, onlar bizə abituriyent yönləndirsinlər, biz də onlara dəstək olaq.”
Qeyd edək ki, mayın 3-də İngla School Baku-nun təşkilatçılığı ilə AMEA Mərkəzi Elmi Kitabxanasında Özbəkistan universitetlərinin sərgisi keçirilib. Tədbirin tərəfdaşları Özbəkistan Ali Təhsil Nazirliyi, Özbəkistanın Azərbaycandakı Səfirliyi, AMEA Mərkəzi Elmi Kitabxanası (MEK), Crossmedia.az Analitik informasiya Portalı idi.
Qardaş Özbəkistanın 15-ə qədər nüfuzlu universitetlərindən – STARS Beynəlxalq Universiteti, Jurnalistika və Kütləvi kommunikasiya Universiteti, Milli Tədqiqatlar Universiteti “Daşkənd İrreqasiya və Aqrotexnika Avtomatlaşdırma İnstitutu”, Özbəkistan-Finlandiya Pedaqogika Universiteti, Səmərqənd Dövlət Xarici Dillər Universiteti, Buxara Dövlət Universiteti, Əbu Əli İbni Sina adına Buxara Dövlət Tibb İnstitutu, İslam Kərimov adına Daşkənd Dövlət Texniki Universiteti, Daşkənd Tibb Akademiyası, Vebster Universiteti (Daşkənd), Turin Politexnik Universiteti Daşkənd Filialı, Kokand Pedaqoji Universiteti, Daşkənd Əczaçılıq Universiteti, Daşkənd Dövlət İqtisadiyyat Universiteti olmaqla 40-dan çox nümayəndə sərgiyə qatılıb.
Emil Bağızadə
13:07 03.05.2025
Oxunuş sayı: 1403
