Gənc rəssam Gülarə Salmanovanın sərgisi keçirildi
Gəncliyə Yardım Fondunda gənc rəssam Gülarə Salmanovanın fərdi sərgisi — “Simfoniya ilə fırça” adlı tədbir keçirildi. Rənglərlə musiqinin harmoniyasını birləşdirən bu sərgi, rəssamın sənətə olan sevgisini və istedadını nümayiş etdirdi.
Tədbirdə sənət, elm, ədəbiyyat dünyasının tanınmış simaları iştirak və çıxış ediblər.
Rəssamın müəllimi Nəvai Mətin Gülarə Salmanovanın uşaqlıqdan rəsmə marağından danışaraq bildirib: “Bizim üçün rəsm müqəddəs bir işdir. Əsas kəmiyyət deyil, keyfiyyətdir. Gülarənin əsərlərinə verdiyi dəyər onun bu sənətə bağlılığını göstərir.”
Rəssam Qafar Sarıvəlli sərginin keçirilməsində əməyi olan hər kəsə, xüsusən də Mübariz Göyüşlüyə təşəkkür edib. O, gənc rəssamın istedadından söz açıb.
Cross Media Təhlil Mərkəzinin analitiki, Müasir İnkişaf Birliyinin sədri Mübariz Göyüşlü sərgini yüksək dəyərləndirərək bildirib: “Bu çox böyük bir işdir. Gənclərin bu cür işlərlə məşğul olması millətin gələcəyinin işıqlı olacağından xəbər verir. Rəsm, sənət, teatr – bunlar millətin varoluşunun göstəriciləridir”.
Şair Rəfael İncəyurd çıxış edərək rəssamın onun sənətə olan münasibətindən və gələcəkdə daha böyük uğurlara imza atacağına inandığını bildirdi.
Rəssam və dizayner Vüsalə Yunusova G.Salmanovaya sənət yolunda uğurlar arzuladı və ilk tanışlıq münasibətlərindən bəhs etdi.
Azərbaycan Milli Xalça Muzeyinin əməkdaşı Mahiyə Kərimova gənc rəssamın əsərlərinin gələcəkdə daha böyük sərgilərdə nümayiş olunacağına inandığını dedi.
Tədbirdə Gülarə Salmanova da çıxış edərək, iştirak edən və ona dəstək olan hər kəsə təşəkkürünü bildirdi. O, sərginin “Simfoniya ilə fırça” adlandırılmasının səbəbini açıqlayaraq bildirdi ki, bu ad onun həm rəsmə, həm də musiqiyə olan marağından irəli gəlir. Rəssam çəkdiyi rəsmlər arasında ən çox sevdiyi əsərin Tomris obrazı olduğunu dedi: “Mən güclü qadınları təsvir etməyi sevirəm”. O, bu işlərdə ona ən böyük dəstəyin ailəsi və dostlarının verdiyini söyləyib.
Aydan Quliyeva,
Nuray Qurbanlı
08:04 21.04.2025
Oxunuş sayı: 23382
