Firəngiz Mütəllimovanın Benefisi: “Varlı qadın” tamaşasının möhtəşəm premyerası
Aprelin 18-də Akademik Milli Dram Teatrında Xalq artisti Firəngiz Mütəllimovanın benefisinə həsr olunmuş “Varlı qadın” tamaşasının premyerası baş tutub. Tamaşa Əməkdar incəsənət xadimi Əli Əmirlinin eyniadlı pyesi əsasında səhnələşdirilib.
Premyera gecəsində sənət aləminin tanınmış simaları – Əməkdar incəsənət xadimi, professor Məryəm Əlizadə, teatrın bədii rəhbəri, Dövlət mükafatı laureatı Mehriban Ələkbərzadə, pyesin müəllifi Əli Əmirli və Teatr Xadimləri İttifaqının sədr müavini Azad Şükürov çıxış edərək Firəngiz Mütəllimovanın sənət yolundan danışıb, onun həm səhnə fəaliyyətini, həm də insani keyfiyyətlərini yüksək dəyərləndiriblər.
Gecədə sənətkara Akademik Milli Dram Teatrının “Yubiley mükafatı” və Teatr Xadimləri İttifaqının “Teatr xadimi” medalı təqdim olunub. Firəngiz Mütəllimova ona göstərilən diqqət və ehtirama görə minnətdarlığını bildirib.
Tamaşanın quruluşçu rejissoru Əməkdar incəsənət xadimi Bəhram Osmanov, səhnə tərtibatçısı Qabil Gözəlov, geyim üzrə rəssamı Aygün Mahmudova, musiqi tərtibatçısı Orxan Murtuzov, rejissor assistenti isə Xanımbacı Həsənovadır.
Səhnə əsərində Xalq artistləri Firəngiz Mütəllimova (Həvva), Sabir Məmmədov (Sarı), aktyor Elçin Nuralıyev (Qara), Əməkdar artistlər Elşən Cəbrayılov (Vəkil), Rövşən Kərimduxt (Əlvan) və digər istedadlı sənətkarlar çıxış edirlər.
“Varlı qadın” tamaşası böyük pulların insan mənəviyyatı və ailə dəyərləri üzərindəki hökmranlığını tənqid edir. Qəhrəmanlar qəfil zənginliklə qarşılaşsalar da, bu maddi azadlıq onları mənəvi eybəcərliyə sürükləyir.
Bu tamaşa təkcə Firəngiz Mütəllimovanın sənətinə ehtiram deyil, eyni zamanda cəmiyyətə ünvanlanan güclü mesajdır.
Ayan Sədi
16:00 19.04.2025
Oxunuş sayı: 13164
