AHİK-nin Əmək və Sosial Münasibətlər Akademiyasında təlim mərkəzi fəaliyyətə başlayıb
Azərbaycan Həmkarlar İttifaqları Konfederasiyasının (AHİK) Əmək və Sosial Münasibətlər Akademiyasında (AƏSMA) İxtisasartırma və Kadrların İnkişafı Mərkəzinin açılışı olub.
Bu barədə Crossmedia.az AƏSMA-na istinadən məlumat verir.
Bununla əlaqədar keçirilən tədbirdə AƏSMA-nın rektor vəzifəsini müvəqqəti icra edən Yusif Ağayev Mərkəzin həmkarlar ittifaqları üzvlərinin bilik və bacarıqlarının artırılması, keyfiyyətli təlim xidmətlərinin həyata keçirilməsi və əmək bazarının tələblərinə uyğun kadr hazırlığı məqsədilə yaradıldığını bildirib, Mərkəzdə yaradılmış şərait barədə məlumat verib.
AHİK-in Aparat rəhbəri Həsən Cəfərov isə Mərkəzin müasir tələblərə cavab verdiyini, səmərəli fəaliyyətinin kadrların ixtisas və hazırlıq səviyyəsinin artırılmasında, yeni layihələrin hazırlanmasında əhəmiyyətini vurğulayıb, Mərkəzin işinə uğurlar arzulayıb.
AƏSMA-nın beynəlxalq əlaqələr üzrə prorektoru Xəyalə Məmmədova, Sosial iş fakültəsinin dekanı Nurəngiz Mikayılova, Həmkarlar ittifaqları kadr və fəalların ixtisasartırma və yenidən hazırlanması şöbəsinin müdiri Səadət Əliyeva çıxış edərək İxtisasartırma və Kadrların İnkişafı Mərkəzində əmək hüquqları, əməyin təhlükəsizliyi, yeni iş metodları kimi aktual mövzularda təlimlərin təşkil olunacağını bildiriblər.
Qeyd olunub ki, Mərkəzdə AHİK-nin üzv təşkilatlarının, eləcə də dövlət qurumlarının, özəl sektorun sifarişi əsasında peşəkar təlimlərin keçirilməsi, ixtisasartırma kurslarının təşkili nəzərdə tutulur.
Təlimlərin interaktiv, real iş keysləri, praktiki tapşırıqlar formatlarında aparılması, təlimçi olaraq müxtəlif sahələr üzrə təcrübəli mütəxəssislərin, beynəlxalq akkreditasiyalı ekspertlərin və mentorların cəlb edilməsi planlaşdırılır.
17:20 09.04.2025
Oxunuş sayı: 1745
