Tələbələr son arxeoloji tədqiqatlarla tanış olublar
AMEA-nın Arxeologiya və Antropologiya İnstitutunda Elm Gününə həsr olunmuş “Açıq qapı” keçirilib.
İnstitutun Gənc Alim və Mütəxəssislər Şurasının təşkilatçılığı ilə keçirilən tədbirin əsas məqsədi arxeologiya və antropologiya elmlərinin aktual istiqamətlərini cəmiyyətə tanıtmaq, bu sahəyə marağı olan insanları institutun fəaliyyəti ilə yaxından tanış etmək və elmi ictimaiyyətlə gənc nəslin arasında körpü yaratmaq olub.
Crossmedia.az xəbər verir ki, bu barədə institutdan bildirilib. İştirakçılar institutun elmi-tədqiqat şöbələri və laboratoriyalarında olub, aparılan son arxeoloji tədqiqatlarla tanış olublar. Onlara müxtəlif arxeoloji tapıntılar, ekspedisiya materialları və tədqiqat nəticələri barədə ətraflı məlumat verilib.
Həmçinin institutun aparıcı alimləri və tədqiqatçıları ilə interaktiv müzakirələr təşkil olunub, gənclər üçün arxeologiya və antropologiya sahəsində mövcud akademik perspektivlər və gələcək elmi imkanlar haqqında məlumat təqdim edilib.
Arxeologiya və antropologiya sahəsinə maraq göstərənlər, xüsusilə də gənc tədqiqatçılar üçün mühüm bir platforma rolunu oynayan tədbirdə Bakı Dövlət Universitetinin, Azərbaycan Universitetinin, ADA Universitetinin tələbələri iştirak ediblər.
12:30 09.04.2025
Oxunuş sayı: 1558
