Almaniyada Azərbaycan musiqisinə həsr olunmuş tədbir keçirilib
Almaniyanın Mönhenqladbax şəhərində Azərbaycan musiqisinə həsr edilmiş “Multikultural nostalji axşamı” adlı konsert proqramı keçirilib. Tədbir Azərbaycan Dövlət Akademik Opera və Balet Teatrının solisti, tanınmış vokal ifaçısı Vüsalə Cabirin təşəbbüsü ilə təşkil olunub.
Bununla bağlı Crossmedia.az Diaspor komitəsinə istinadən məlumat verir.
Konsertdə “Könül Dostları” xor qrupu Üzeyir Hacıbəylinin “Leyli və Məcnun” operasından “Şəbu-Hicran” xor səhnəsini, Qulu Əsgərovun “Gəlmədin yar” romansını, “Bu qala daşlı qala” xalq mahnısını və müxtəlif türk xalq musiqilərini ifa edib.
Daha sonra, konsertin bədii rəhbəri Vüsalə Cabir pianoçu Səbinə Məmmədova və “Qala” qrupunun müşayiəti ilə Fikrət Əmirov, Səid Rüstəmov, alman bəstəkar Teo Makeben və italyan bəstəkar Vinçenzo Di Kiaranın əsərlərini səsləndirib. Musiqi nömrələri müxtəlif dillərdə və janrlarda təqdim olunub və böyük maraqla qarşılanıb.
Tədbirə Almaniya, Fransa və Niderlanddan olan azərbaycanlı diaspor nümayəndələri ilə yanaşı Azərbaycana dost münasibət bəsləyən xalqların nümayəndələri də iştirak edib. “Ana Vətən” Avropa Azərbaycanlı Qadınlar Birliyinin sədri Mayisə Ağamirzəyeva çıxışında Vüsalə Cabirin Azərbaycan musiqisinin Avropada təbliğindəki əvəzsiz xidmətlərini yüksək qiymətləndirib və ona Fəxri Fərman təqdim edib.
Vüsalə Cabirin təşəbbüsü ilə təşkil olunan “Multikultural nostalji axşamı” layihəsi artıq bir neçə ildir davam edir. Layihənin məqsədi müxtəlif xalqları musiqi vasitəsilə birləşdirmək, Azərbaycan musiqisini beynəlxalq səviyyədə tanıtmaq və yaymaqdır.
Hal-hazırda Almaniyada fəaliyyətini davam etdirən Vüsalə Cabir "Könül Dostları" Mədəniyyət Dərnəyində xor rəhbəri, səs müəllimi və solist kimi çalışır. O, 2005-ci ildə Muğam Müsabiqəsinin laureatı olaraq tanınıb.
20:00 08.04.2025
Oxunuş sayı: 1679
