Kişineuda Novruz şənliyi təşkil olunub
Moldovanın paytaxtı Kişineu şəhərində Novruz şənliyi keçirilib.
Crossmedia.az xəbər Moldova mətbuatına istinadla verir ki, Moldova Azərbaycanlıları Konqresinin (MAK) təşkilatçılığı ilə açıq havada keçirilən Novruz tədbirində ölkə rəsmiləri, xarici ölkələrin səfirliklərinin diplomatları, Moldova parlamentinin deputatları, Azərbaycan diasporunun nümayəndələri iştirak ediblər.
Çıxış edən MAK-ın sədri Elçin Bayramov belə tədbirlərin icma əlaqələrinin möhkəmləndirilməsi baxımından əhəmiyyətini vurğulayıb:
“Bugünkü bayram bir daha sübut edir ki, Azərbaycan xalqının mədəniyyəti hər yerdə çiçəklənir və bizi birləşdirir. Hər il bayramımız daha da parlaq olur, təkcə Azərbaycan diasporunun bütöv ailələrini deyil, həm də xalqımızın mədəniyyətinə hörmətlə yanaşan qonaqları bir araya toplayır. Burada uşaqlar öz əcdadlarının adət-ənənələri ilə tanış olur, gənclər öz doğma yurdlarından ilham alırlar, böyüklər isə etnik kimliyimizi qorumaq, adət-ənənələrimizi inkişaf etdirmək və cəmiyyətin həyatında iştirak imkanı qazanırlar”.
Azərbaycan Parlamentlərarası Dostluq Qrupunun sədri Vitali Yakot etnik azlıqların milli kimliyinin və mədəni ənənələrinin qorunub saxlanmasının vacibliyini qeyd edib. Millətlərarası Münasibətlər Agentliyinin direktoru Vyaçeslav Ryabçinski də Azərbaycan diasporuna sülh, xeyirxahlıq və firavanlıq arzulayıb. Moldova Respublikasının energetika naziri Dorin Jungietu belə tədbirlərin xalqlar arasında qarşılıqlı hörmətin möhkəmləndirilməsi baxımından əhəmiyyətini qeyd edib.
Çıxışlardan sonra tədbirin əyləncəli hissəsi milli Azərbaycan rəqsinin ifası ilə başlayıb. Bayram Azərbaycan folklorunun ənənəvi qəhrəmanları – Keçəl və Kosanın iştirakı teatrlaşdırılmış səhnəcik hazırlayan MAK-ın bazar günü məktəbinin şagirdlərinin çıxışları ilə davam edib.
Qonaqlar üçün, həmçinin məktəblilərin ifasında “Arşın mal alan” operettası, “Süleymani” xalq rəqsi, Abdulla Rzayevin ifa etdiyi “Novruz gəlir” mahnısı, Azərbaycan icmasının tanınmış musiqiçisi Rəşad Sadıqovun virtuoz skripkada ifası təqdim olunub. Konsert məktəbin balaca şagirdlərinin “Bulaq başında” adlı gözəl rəqs kompozisiyası ilə başa çatıb.
Bayramın əyləncəli anlarından biri, Novruzun simvolu sayılan boyalı yumurtalarla keçirilən ənənəvi “yumurta döyüşləri” olub.
Tədbir Azərbaycan mətbəxinin ləziz bayram yeməklərinin təqdimatı ilə sona çatıb.
18:52 23.03.2025
Oxunuş sayı: 13795
