“Binance”ə kiberhücum: 6,3 milyard dollarlıq təhlükəsizlik insidenti
Dünyanın ən böyük kriptovalyuta birjalarından biri olan “Binance” mümkün kiberhücumla üzləşib. Hadisə ilə əlaqədar “Tether” və “Circle” şirkətləri 2,38 milyard dollardan çox kriptovalyuta aktivini dondurub.
Crossmedia.az xəbər verir ki, “Reuters” agentliyi bu barədə məlumat yayıb.
“Binance”in həmtəsisçisi Çanpen Çjao (Changpeng Zhao) birjada baş verən hadisənin kiberhücuma bənzədiyini bildirib.
Onun sözlərinə görə, hazırda şirkətin idarəçiliyində iştirak etməsə də, səhmdar kimi istifadəçilərin bütün vəsaitlərinin qorunacağını gözləyir.
Məlumata əsasən, “Tether” hadisə ilə əlaqəli təxminən 1,57 milyard dollar, “Circle” isə 800 milyon dollardan çox rəqəmsal aktivi dondurub.
“Binance” mümkün təhlükəsizlik pozuntusunu araşdırdığını, istifadəçilərin vəsaitlərinin təhlükəsiz olduğunu açıqlayıb.
Şirkətin məlumatına görə, ümumilikdə 2,54 milyard dollarlıq kriptovalyuta aktivinin dondurulması təmin edilib. Əlavə aktivlərin müəyyənləşdirilməsi və dondurulması istiqamətində hüquq-mühafizə orqanları və digər tərəfdaşlarla əməkdaşlıq aparılır.
Hadisə kriptovalyuta bazarına da təsir göstərib. “Bitcoin”in qiyməti altı həftənin ən aşağı səviyyəsinə enərək 77 646 dollara düşüb. “Ethereum” və “BNB” də ucuzlaşıb.
Kiberhücumun dəqiq miqyası və mümkün maliyyə itkiləri ilə bağlı araşdırma davam edir.
10:09 30.10.2026
Oxunuş sayı: 236
