Yaxın Şərq
Milyonlarla azərbaycanlını siyahıya almaq istəmirlər! – Tehrandan növbəti addım
İran Prezidenti Məsud Pezeşkianın "X" sosial şəbəkə hesabında ölkədəki vahid məlumat bazası ilə bağlı etdiyi bəyanat regional ekspertlər və diqqətli müşahidəçilər arasında geniş müzakirələrə səbəb olub. Pezeşkian paylaşımında qeyd edib ki, qeydiyyata əsaslanan siyahıyaalma haqq və ədalət təməlində ağıllı idarəetmə, nəzarət və qiymətləndirmə üçün dəyərli bir addımdır. O, uzun illər ərzində vahid məlumatların olmamasının ölkədə ayrı-seçkiliyə zəmin yaratdığını bildirərək, dəqiq məlumatların toplanmasının bütün ölkə ərazisində ədalətin icrasına şərait yaradacağını, eləcə də layihələrin səmərəliliyini və məhsuldarlığı artıracağını iddia edib. Lakin Pezeşkianın ədalət və şəffaflıqla bağlı bu vədləri Tehran rejiminin illərdir yürütdüyü etnik və sosial siyasət fonunda ciddi şübhələrlə qarşılanır.
Mövzu ilə bağlı Crossmedia.az-a açıqlama verən Yaxın Şərq məsələləri üzrə ekspert Rufiz Hafizoğlu Pezeşkianın bəyanatının pərdəarxasını, Tehran rejiminin bilərəkdən saxladığı informasiya boşluğunu və etnik faktorları ətraflı şərh edib:
"İranda vahid məlumat bazasının olmaması texniki problemlərdən qaynaqlanan bir məsələ deyil. Bu, İranda bilərəkdən uzun illər boyunca vahid bazanın yaradılmamasında məhz elə İran rejiminin bilavasitə məsuliyyəti və marağı var. Düşünmürəm ki, Pezeşkianın bu bəyanatından sonra İranda dini iqtidar, həqiqətən, vahid baza yaradacaq, orada qeyri-fars etnik qruplar, o cümlədən milyonlarla azərbaycanlı öz layiq olduğu yerlərini tutacaq. Bunlar reallıqdan uzaq yanaşmalardır. Heç bir halda İranda tam şəffaf vahid məlumat bazasının yaradılması bugünkü İran rejiminin köklü maraqlarına xidmət etmir".
Rufiz Hafizoğlu sosial şəffaflıq iddialarına skeptik yanaşaraq fikrini belə tamamlayıb:
"Ona görə də hər hansı bir bazanın yaradılacağı və bu bazanın sosial şəffaflığa, etnik ədalətə müsbət təsir edəcəyi mənim üçün inandırıcı görünmür. Rejim hakimiyyətdə qaldığı müddətdə nəzarətsiz və qeyri-şəffaf idarəetmə mexanizmini qoruyub saxlamağa üstünlük verəcək".
Zeynəb Həsən
14:00 26.10.2026
Oxunuş sayı: 62
