Ərdoğan məktəbi: Qətiyyətin və cəsarətin simvolu
Türkiyə Prezidenti Rəcəb Tayyib Ərdoğan dünya siyasətinin mürəkkəb xətlərini dəyişən lider kimi səhnəyə çıxdı. Onun hər addımı, jesti diplomatik protokol qaydalarının sərhədlərini yenidən çəkir. Qərb liderlərinin çoxu üçün gözlənilməz olan bu davranışlar Ərdoğanı beynəlxalq arenada müzakirə olunan və hörmət bəslənən bir figura çevirdi. Bu unikal üslub, həm təriflər, həm də tənqidlər toplasa da, onu dünya liderləri arasında xüsusi və fərqli bir mövqeyə daşıdı.
Mövzu ilə bağlı Crossmedia.az-a açıqlama verən Ədalət, Hüquq, Demokratiya (ƏHD) Partiyasının idarə heyətinin üzvü, siyasi şərhçi Əli Zülfüqaroğlu “Ərdoğan məktəbi” ifadəsinin həqiqətlərini əks etdirdiyini vurğulayıb:
“Türkiyə Prezidenti Ərdoğan, diplomatik protokol qaydalarını dəyişdirən lider olaraq tarixə düşüb. "Ərdoğan məktəbi" ifadəsi də bu həqiqəti əks etdirir. Qərb liderləri arasında yalan danışmaq adi hal kimi qəbul edilərkən, Ərdoğan dəfələrlə onları siyasi əxlaq normalarına riayət etməyə çağırıb və özü də buna əməl edib. Liderlər öz sözlərinin ağası olmalı və verdikləri sözə əməl etməlidirlər,” - deyə Zülfüqaroğlu bildirib.
Siyasi səhnədə zaman-zaman əxlaqın unudulduğu anlar olur. Fransa, bu acı həqiqəti açıqca nümayiş etdirən bariz nümunədir.
“Fransa buna bir nümunədir. Məsələn, Makron özü, Azərbaycan öz torpaqlarını işğaldan azad edərkən, Azərbaycanın Ermənistanın işğal etdiyi ərazilərdən geri çəkilməli olduğunu bəyan etmişdi. Bu, siyasi əxlaqsızlıq nümunəsi idi və Fransanın dünyada nüfuzdan düşməsinə səbəb oldu. Türkiyə isə geosiyasi olaraq güclənib və mövqelərini möhkəmləndirib. Ərdoğanın yürütdüyü siyasət, onun qətiyyəti və cəsarəti ilə xarakterizə olunur. Bu, Türkiyənin xarici təzyiqlərə boyun əyməməsi ilə əlaqədardır və bu gün Ərdoğan dünyada güvənilən liderlərdən biri hesab olunur,” - deyə Ə.Zülfüqaroğlu bildirib.
Politoloq həmçinin qeyd edib ki, Ərdoğanın yaratdığı üslub, yeni siyasi yanaşmaların nümunəsinə çevrilib.
“Dünya siyasətində protokol qaydalarının bir kənara atılması ilə nəticələnib. Prezident Putin də Ərdoğanı cəsarətli və önəmli xarakterə malik lider kimi xarakterizə edib. Geosiyasi mərhələdə yeni ittifaqlar və siyasi xəttlər meydana çıxacaq və Ərdoğan nümunəsi kimi yanaşma tərzləri dünya nizamının formalaşmasında önəmli addım olacaq”.
Beləliklə, Ərdoğanın adı, tarixdə qətiyyət və cəsarətin simvolu olaraq qalacaq.
Samirə Şərif
09:27 14.12.2024
Oxunuş sayı: 7875
