"Qloballaşan dünyada ənənəvilik və müasirlik” mövzusunda regional konfrans başa çatıb
Dekabrın 10-da Mingəçevirdə keçirilən “Qloballaşan dünyada ənənəvilik və müasirlik” mövzusunda regional konfrans işini panel sessiyalarla davam etdirib.
Crossmedia.az Dini Qurumlarla İş üzrə Dövlət Komitəsi-nə istinadən bildirir ki, regional konfransın “Ənənəvi İslam: tarixi təcrübə və müasir reallıqlar” mövzusuna həsr edilən panel sessiyasına Mənəvi Dəyərlərin Təbliği Fondunun icraçı direktorunun müavini Ceyhun Əliyev moderatorluq edib.
Azərbaycan İlahiyyat İnstitutunun (Aİİ) rektoru Aqil Şirinov ənənəvi dəyərlərin cəmiyyətdaxili birliyin qorunmasındakı rolu barədə danışıb. Vurğulayıb ki, əsrlər boyu ölkəmizdə müxtəlif dinlərə mənsub insanların sülh və əmin-amanlıq şəraitində yaşamaları Azərbaycandakı ənənəvi dini həyatda tolerantlığın praktiki bir əsas kimi mənimsənilməsini göstərir. Cəmiyyətimizdəki ənənəvi dini düşüncə dinlərarası tolerantlığa, eləcə də İslam məzhəbləri arasındakı qardaşlıq prinsipinə əsaslanır və ayrı-seçkiliyə qarşı açıq mövqe nümayiş etdirir.
Azərbaycan Respublikası Milli Məclisinin İctimai birliklər və dini qurumlar komitəsinin sədr müavini Sahib Alıyev bəzi qrupların dünyəvilik anlayışını məqsədli şəkildə istismar etməsinin yolverilməzliyinə diqqəti çəkib. Bildirib ki, Azərbaycan Respublikası dünyəvi dövlət olsa da, dinə dövlət qayğısı yüksək səviyyədədir. Dövlət müstəqilliyi, azərbaycançılıq məfkurəsi cəmiyyəti birləşdirən ideallar, dinimiz bizim mənəvi dəyərimizdir.
Mövzu ilə bağlı təqdimatla çıxış edən Dini Qurumlarla İş üzrə Dövlət Komitəsinin sədr müavini Gündüz İsmayılov dinə şəriət və mədəniyyət müstəvisindən yanaşaraq, fərqli baxışları şərh edib. Bildirib ki, ənənəvi İslam dinin siyasiləşdirilməsini və bölücülüyü təbliğ edən yad dini-ideoloji təsirlərin qarşısının alınmasında mühüm rol oynayır.
Bakı İlahiyyat Kollecinin direktoru Mehman İsmayılovun moderatorluğu ilə keçirilən “Milli-mənəvi dəyərlərin təbliğində din xadimlərinin məsuliyyəti və rolu” adlı paneldə İslam dininin əsl mahiyyətinin təbliği və təşviqində, yad dini cərəyanların və zərərli təsirlərin qarşısının alınmasında din xadimlərinin fəallığının artırılması barədə fikir mübadiləsi aparılıb.
Aİİ-nin müəllimi, ilahiyyat üzrə fəlsəfə doktoru, dosent Aslan Həbibov İslam tarixində məzhəblərarası münasibətlərə mənfi təsir göstərən amillərdən biri olan məzhəb təəssübkeşliyinin neqativ təzahürlərinə diqqət çəkib.
Daha sonra çıxış edən Aİİ-nin müəllimi, ilahiyyat üzrə fəlsəfə doktoru Kövsər Tağıyev İslam dünyasında modernləşmə düşüncəsinin tarixi haqqında fikirlərini bölüşüb. Həmçinin Hacı Məcid Əfəndinin timsalında nümunəvi din xadimi obrazı barədə fikirlərini səsləndirib.
Qafqaz Müsəlmanları İdarəsinin bölgə qazısı Əli Məmmədov dini maarifləndirmə işinin genişləndirilməsi və dövlət-din münasibətlərinin daha da inkişaf etdirilməsində din xadimlərinin roluna toxunub. Bildirib ki, din xadimlərinə maddi dəstək göstərilməsi, dini ibadət yerlərində mütəmadi təmir-bərpa işlərinin aparılması dövlətinbu sahəyə göstərdiyi qayğının nümunələridir.
Çıxışlardan sonra səsləndirilən təkliflərlə bağlı fikir mübadiləsi aparılıb, suallar cavablandırılıb.
Tədbirin yekununda çıxış edən Ramin Məmmədov dini sahədə maarifləndirmə işinin müasir tələblərə uyğunlaşdırılmasında bu cür tədbirlərin mütəmadi olaraq keçirilməsinin zəruriliyini, panel sessiyalarda səsləndirilən təkliflərin, qaldırılan məsələlərin təhlil olunacağını qeyd edib. Bildirib ki, bu gün dindən müxtəlif mərkəzlərin maraqlarının reallaşdırılması aləti kimi istifadə edilməsi, eləcə də dini fərqliliklərin cəmiyyətdə qütbləşməyə yönəldilməsi cəhdlərinin qarşısını almaq üçün ən effektiv üsul bu sahədə güclü kadr potensialının yaradılmasıdır. Dövlət Komitəsinin sədri Dini təhsilin inkişaf etdirilməsinin strateji hədəfləri reallaşdırmaq üçün zərurətə çevrildiyini vurğulayıb.
18:32 10.12.2024
Oxunuş sayı: 8727
