Azərbaycanla Ərəb ölkələri arasında əlaqələr inkişaf edir- Rəy
Azərbaycanın xarici siyasət kursunda müxtəlif regionlarla balanslı və qarşılıqlı maraqlara əsaslanan əməkdaşlıq mühüm yer tutur. Prezident İlham Əliyevin dəfələrlə vurğuladığı kimi, müsəlman dünyası, o cümlədən ərəb ölkələri ilə münasibətlər Azərbaycanın xarici siyasətində prioritet istiqamətlərdən biri hesab olunur. Bu yanaşma həm tarixi və mədəni bağlılıqlar, həm də siyasi və iqtisadi əməkdaşlığın genişləndirilməsi baxımından xüsusi əhəmiyyət daşıyır. Son illərdə Azərbaycanla ərəb ölkələri arasında əlaqələrin yeni mərhələyə qədəm qoyması, qarşılıqlı investisiya, enerji, turizm və digər sahələrdə əməkdaşlığın genişlənməsi bu münasibətlərin strateji xarakter aldığını göstərir. Bu kontekstdə ərəb ölkələri ilə diplomatik münasibətlərin mövcud vəziyyəti və perspektivləri xüsusi müzakirə mövzusuna çevrilir.
Milli Məclisin deputatı Fariz İsmayılzadə Azərbaycanın ərəb ölkələri ilə siyasi münasibətləri haqqında Crossmedia.az-a açıqlama verib:
"Azərbaycanın xarici siyasətində bütün regionlarla əməkdaşlıq xüsusi prioritet təşkil edir. Ərəb ölkələri ilə, müsəlman dünyası ilə əməkdaşlıq mühüm istiqamətlərdən biridir. Çünki unutmayaq ki, Qarabağın işğalı zamanı beynəlxalq təşkilatlarda, müxtəlif qətnamələrin qəbul olunmasında məhz Ərəb təşkilatları, Ərəb ölkələri və müsəlman ölkələri Azərbaycana dəstək olurdular. Ermənistana qarşı qəbul olunan müxtəlif qətnamələrdə də onların dəstəyi özünü göstərirdi.Son dövrlərdə Ərəb ölkələri ilə əməkdaşlıq yalnız siyasi istiqamətdə deyil, eyni zamanda iqtisadi istiqamətdə də inkişaf edir. Xatırlatmaq istərdim ki, bu yaxınlarda Birləşmiş Ərəb Əmirliklərinin “Masdar” şirkəti və Səudiyyə Ərəbistanının “ACWA Power” şirkəti Azərbaycanda çoxmilyardlı investisiyalar həyata keçiriblər. Bu, olduqca böyük layihələrdir və ölkəmizin enerji sahəsində ciddi dəyişikliklərə səbəb olur, enerji sektorunun inkişafına, alternativ energetikanın, xüsusilə günəş və külək enerjisinin istehsalına töhfə verir".
Deputata əlavə edib ki, digər layihələr də mövcuddur: "Xüsusilə turizm sahəsində, tikinti sektorunda müsəlman ölkələri ilə müxtəlif formatlarda əməkdaşlıq həyata keçirilir. Eyni zamanda D-8 təşkilatı çərçivəsində əməkdaşlıq bizim üçün yeni platformadır. İslam Əməkdaşlıq Təşkilatı, Türk Dövlətləri Təşkilatı kimi qurumlar vasitəsilə də bu münasibətlər inkişaf etdirilir. Biz bütün bu platformalardan istifadə edirik və mən bunu yüksək qiymətləndirirəm. Bu əməkdaşlıqlar Azərbaycanın güclənməsinə dəstək olur".
Ayhan
13:15 12.02.2026
Oxunuş sayı: 520
