BƏƏ ilə Azərbaycan arasında əlaqələr ardıcıl şəkildə inkişaf edir - Açıqlama
Azərbaycanla BƏƏ arasında son illər sürətlə inkişaf edən strateji tərəfdaşlıq təkcə siyasi və iqtisadi sahələrlə məhdudlaşmır, eyni zamanda şəhərlərarası əməkdaşlıq səviyyəsinə də yüksəlir. İki ölkə rəhbərliyi arasında formalaşmış yüksək səviyyəli siyasi dialoq regional və beynəlxalq platformalarda qarşılıqlı etimadın möhkəmlənməsinə, eləcə də praktiki əməkdaşlıq mexanizmlərinin genişlənməsinə şərait yaradır.
Bu kontekstdə Bakı və Əbu-Dabi şəhərləri arasında qardaşlaşma münasibətlərinin qurulması təşəbbüsü Azərbaycan–BƏƏ əlaqələrinin yeni və simvolik mərhələsi kimi qiymətləndirilir. Şəhərlər arasında belə bir tərəfdaşlıq təkcə mədəni və humanitar mübadiləni gücləndirməyəcək, həm də investisiya, turizm və şəhər idarəçiliyi sahələrində təcrübə paylaşımı üçün geniş imkanlar yaradacaq.
Bu barədə Crossmedia.az-a danışan Milli Məclisin deputatı Ceyhun Məmmədov bildirib ki, Prezidentin BƏƏ-yə səfəri çərçivəsində və səfər zamanı keçirilən görüşlərdə bir çox mühüm məsələ ətrafında geniş və səmərəli fikir mübadiləsi aparılmışdır: "Bu gün məmnunluqla qeyd etmək olar ki, BƏƏ ilə Azərbaycan arasında əlaqələr ardıcıl şəkildə inkişaf edir və yeni mərhələyə qədəm qoyur. Biz bu münasibətlərin davamlı olaraq möhkəmləndiyinin şahidiyik. Hazırda bu siyasət ardıcıl və məqsədyönlü şəkildə davam etdirilir. Heç şübhəsiz ki, BƏƏ mədəniyyət nümayəndələrinin ölkəmizə səfəri və keçirilən görüşlər də bu baxımdan xüsusi əhəmiyyət daşıyır. Bu görüşlərin keçirilməsi ümumi məqsəd və hədəflərə söykənir. Eyni zamanda, Əbu-Dabi ilə Azərbaycan şəhərləri arasında qardaşlaşma təşəbbüsünün reallaşması da xüsusi önəm kəsb edir. Bu proses hər iki xalq arasında dostluğun və qarşılıqlı etimadın daha da möhkəmlənməsinə xidmət edir".
Parlamentarinin fikrincə, bu əlaqələrin dərinləşməsi və institusional əsasda inkişafı münasibətlərimizin yeni mərhələyə, yeni əməkdaşlıq dövrünə daxil olmasına zəmin yaradacaq: "Şəhərlərin qardaşlaşması həm siyasi, həm iqtisadi, həm də mədəni baxımdan böyük əhəmiyyətə malikdir. Bu təşəbbüs hər iki ölkənin maraqlarına xidmət edir, əlaqələrin daha da genişlənməsinə, möhkəmlənməsinə və yeni istiqamətlərdə inkişafına şərait yaradır. Növbəti dövrlərdə biz bu əməkdaşlığın real nəticələrini və müsbət təsirlərini daha aydın şəkildə görəcəyik".
Elmir Heydərli
12:48 05.02.2026
Oxunuş sayı: 579
