ASAN xidmət modelinin Pakistanda tətbiqi hər iki ölkə üçün yeni imkanlar yaradacaq - Deputat
Son illər Azərbaycan tərəfindən formalaşdırılan və beynəlxalq səviyyədə tanınan “ASAN xidmət” modeli müasir dövlət idarəçiliyinin uğurlu nümunələrindən biri kimi çıxış edir. Vətəndaş məmnunluğunu əsas prioritet kimi müəyyən edən bu model dövlət xidmətlərinin şəffaf, operativ və əlçatan şəkildə təqdim olunmasına xidmət edir. Azərbaycanın bu sahədə qazandığı təcrübənin dost və tərəfdaş ölkələrlə bölüşülməsi isə ölkəmizin institusional idarəetmə sahəsində artan nüfuzunun göstəricisidir.
Məhz bu kontekstdə Pakistan İslam Respublikasında ilk “ASAN xidmət” mərkəzinin fəaliyyətə başlaması Azərbaycan-Pakistan münasibətlərinin strateji xarakterini bir daha təsdiqləyir. Pakistanın Baş naziri Məhəmməd Şahbaz Şərifin mərkəzin açılışı zamanı Azərbaycan Prezidenti İlham Əliyevə göstərilən dəstəyə görə təşəkkür etməsi, “ASAN xidmət” modelinin beynəlxalq etimad qazandığını və praktiki səmərəliliyinin yüksək qiymətləndirildiyini nümayiş etdirir.
Məsələ ilə bağlı Milli Məclisin deputatı Ülviyyə Həmzəyeva Crossmedia.az-la öz fikirlərini bölüşüb:
"Pakistanın Baş naziri Şahbaz Şərifin Prezident İlham Əliyevə “ASAN xidmət” modelinin tətbiqi ilə bağlı təşəkkürü, Azərbaycan dövlət idarəçiliyinin artıq beynəlxalq səviyyədə etibarlı brendə çevrildiyini təsdiqləyir. “ASAN xidmət” təkcə ölkəmizdə dövlət xidmətlərinin şəffaflaşdırılması və vətəndaş məmnunluğunun artırılması üçün yaradılmış uğurlu model deyil, bu gün Azərbaycan tərəfindən dünyaya ixrac olunan innovativ idarəetmə nümunəsidir.
Pakistanın İslamabadda ilk ASAN mərkəzinin açılması və bu təşəbbüsün digər bölgələrdə də genişləndirilməsi planı iki qardaş ölkə arasında strateji münasibətlərin yeni mərhələyə qədəm qoyduğunu göstərir. Bu layihə Pakistan üçün dövlət xidmətlərinin modernləşdirilməsi, elektron hökumət infrastrukturunun gücləndirilməsi və vətəndaş yönümlü idarəetmənin inkişafı baxımından mühüm əhəmiyyət daşıyır.
Azərbaycan üçün isə bu, milli brendin qlobal səviyyədə tanıdılması, həmçinin Azərbaycanın institusional təcrübəsinin dünya miqyasında tətbiqi deməkdir. Prezident İlham Əliyev dəfələrlə vurğulayıb ki, “ASAN xidmət” Azərbaycan dövlət idarəetməsinin ən uğurlu innovasiya layihəsidir və “Azərbaycanın intellektual məhsulu kimi artıq beynəlxalq brendə çevrilib”. Dövlət başçısı bildirib ki, ASAN modeli dövlət xidmətlərinin şəffaflığı, operativliyi və məmnunluq səviyyəsinə görə dünya üzrə nümunədir".
Deputat, həmçinin bu əməkdaşlığın həm də Azərbaycan–Pakistan əlaqələrinin mahiyyətinə uyğun olaraq qardaşlıq, etimad və qarşılıqlı dəstək ruhuna söykəndiyini qeyd edib:
"İnanıram ki, ASAN xidmət modelinin Pakistanda tətbiqi hər iki ölkə üçün idarəetmə sahəsində yeni imkanlar açacaq və dövlət xidmətlərinin keyfiyyətinin yüksəldilməsində qarşılıqlı faydalı nəticələrə gətirib çıxaracaq".
Elmir Heydərli
14:23 17.01.2026
Oxunuş sayı: 4770
