Qarabağın azad edilmiş ərazilərində yenidənqurma və abadlıq işləri dövlətin prioritetidir-Deputat
Azərbaycanın işğaldan azad olunmuş ərazilərində yenidənqurma və abadlıq işləri sürətlə davam edir. Prezident İlham Əliyevin Ağdərə şəhərinin və ətraf kəndlərin sakinləri ilə görüşündə vurğuladığı kimi, bu bölgələr yalnız yaşayış üçün deyil, həm də sənaye və turizm mərkəzi kimi inkişaf etdiriləcək. Dağları, meşələri, bulaqları və çayları ilə seçilən Ağdərə və ətraf kəndlərin gələcək inkişaf perspektivi ölkəmizin iqtisadi və sosial həyatında mühüm rol oynayacaq.
Prezident İlham Əliyevin Ağdərəyə səfəri və orada səsləndirdiyi fikirlər barədə Crossmedia.az-a danışan Milli Məclisin deputatı Tənzilə Rüstəmxanlı bildirib ki, işğaldan azad edilmiş Qarabağ torpaqlarında aparılan yenidənqurma və bərpa işləri Azərbaycan dövlətinin prioritet məsələlərindən biridir: “Qarabağda aparılan bərpa və yenidənqurma işləri dövlətin qarşısına qoyduğu ən vacib məsələlərdəndir. Biz bunu büdcə müzakirələrində də görmüşük. Büdcənin böyük bir hissəsi məhz bu bərpa işlərinə, Qarabağdakı infrastrukturun yenidən qurulmasına yönəldilib. 30 ildən artıq işğal altında qalmış, darmadağın edilmiş torpaqlarımızın yenidən qurulması Azərbaycan üçün milli məsələdir və dövlət bunu yüksək səviyyədə həyata keçirir”.
Deputat əlavə edib ki, bərpa işləri təkcə Şuşa, Zəngilan, Ağdam və Füzul ilə məhdudlaşmır: “Bütün azad edilmiş Qarabağ əraziləri yenidən qurulur, münbit torpaqlara can suyu verilir. Qaçqınlarımız öz ata-baba torpaqlarına, vətənlərinə qayıdır və bu, böyük sevinci ilə müşayiət olunur. Cənab Prezident İlham Əliyevin rəhbərliyi ilə həyata keçirilən bu işlər Azərbaycanın suverenliyini təmin edir və ərazi bütövlüyümüzü möhkəmləndirir. Dövlət olaraq qarşımıza məqsəd qoymuşuq ki, işğaldan azad edilmiş torpaqlarımızı yenidən cənnətə çevirək. Bu proses həm vətənə, həm də millətə xidmətin təzahürüdür”.
Parlamentari vurğulayıb ki, görülən işlər həm böyük hünər, həm də strateji baxımdan önəm tələb edir: “Qısa zaman ərzində Qarabağın hər bir parçasının yenidən bərpası, abadlaşdırılması Azərbaycan dövlətinin uğurlu və planlı siyasətinin nəticəsidir. Dünyaya göstərilir ki, Qarabağ, həqiqətən də, Azərbaycanın ayrılmaz bir hissəsidir və bu torpaqlar indi real mənada cənnətə çevrilir”.
Mehriban Yariyeva
12:32 16.01.2026
Oxunuş sayı: 1568
