Azərbaycanın Rusiya-Ukrayna müharibəsində daha həssas davranmaq hüququ var - Siyasətçi
Rusiya–Ukrayna müharibəsi fonunda region ölkələrinin tutduğu mövqe xüsusi diqqətlə izlənilir. Çünki bu münaqişə təkcə iki dövlət arasında qarşıdurma deyil, eyni zamanda beynəlxalq münasibətlər sistemində yeni balansların formalaşmasına səbəb olan prosesdir. Belə bir şəraitdə tərəflərdən biri ilə yaxınlaşmanın digər tərəflə münasibətlərə necə təsir göstərəcəyi sualı aktuallaşır. Məhz bu kontekstdə Azərbaycanın Rusiya–Ukrayna müharibəsi ilə bağlı tutduğu balanslı və praqmatik mövqe həm regional, həm də beynəlxalq müstəvidə maraq doğurur.
Mövzu ilə bağlı Ağ partiya sədri Tural Abbaslı Crossmedia.az-a açıqlama verib:
"İstənilən halda, iki müharibə aparan tərəfdən biri ilə münasibətləri yaxşılaşdırdıqda, bu, avtomatik olaraq digər tərəflə münasibətlərin eyni dərəcədə soyumasına gətirib çıxarır. Yəni, dolayısı ilə desək, bu münasibətlər tərs mütənasibdir: birindən qalxırsa, digərindən düşür.
Lakin Azərbaycan münaqişənin ilk günündən etibarən balanslı siyasət yürütməyə çalışıb. Nə Ukraynanın işğal olunmuş ərazilərini Rusiya kimi tanıyıb, nə də Rusiyanın hücumunu və aqressiyasını dəstəkləyib. Bununla yanaşı, Azərbaycan Rusiyaya qarşı tətbiq olunan beynəlxalq təzyiqlərə və sanksiyalara da qoşulmayıb.
Bu mövqe ilə Azərbaycan həm Rusiya, həm də Ukraynaya açıq mesaj verir ki, bu məsələdə bərabər məsafə saxlayır və beynəlxalq hüquq normaları çərçivəsində yanaşır. Üstəlik, Azərbaycanın bu məsələdə daha həssas davranmaq hüququ var. Çünki Azərbaycan da Ukrayna kimi işğala və aqressiyaya məruz qalmış ölkədir.
Məhz buna görə də Azərbaycanın tutduğu mövqe anlaşılandır. Əgər Azərbaycan Ukrayna–Rusiya münaqişəsində tərəflərin birbaşa maraqlarına toxunacaq addımlar atmazsa, düşünmürəm ki, Rusiya–Azərbaycan münasibətləri məhz bu səbəbdən ciddi şəkildə zərər görsün. Çünki Azərbaycan Ukraynaya humanitar yardım da göndərir. Səhv etmirəmsə, fövqəladə hallar qurumları üçün yanacaq və digər zəruri ləvazimatlar da təqdim olunub. Rusiya isə bu məsələni Azərbaycan qarşısında fakt kimi qoymur".
Siyasətçi əlavə edib ki, eyni zamanda Azərbaycan Avropa və Qərbin Rusiyaya qarşı tətbiq etdiyi sanksiyalara da qoşulmur: "Yəni, bir mənada hər iki dövlətlə ayrı-ayrılıqda münasibətlər qurur.
Amma əgər Azərbaycan sabah Ukraynaya silah-sursat satmağa, hərbi dəstək verməyə və açıq şəkildə Ukraynanın mövqeyini müdafiə edib Rusiyaya qarşı çıxmağa başlasa, təbii ki, bu, münasibətlərdə əks effekt yarada bilər. Lakin iki dövlət arasında iqtisadi, mədəni və siyasi əlaqələr tənzimlənir və davam etdirilirsə, düşünmürəm ki, bu səbəbdən Rusiya–Azərbaycan münasibətləri xüsusi şəkildə kəskinləşsin.
Zatən müharibənin ilk günlərindən etibarən Azərbaycanın tutduğu balanslı mövqe bu günə qədər qorunub saxlanılır və eyni xətt üzrə də davam edir".
Ayhan
15:24 14.01.2026
Oxunuş sayı: 1743
