Orduda qalmaq istəyənlər üçün real perspektiv yaradılır- Detallar açıqlandı
Azərbaycanda müdafiə və təhlükəsizlik sahəsində aparılan islahatlar çərçivəsində hərbi xidmətin hüquqi və institusional əsaslarının təkmilləşdirilməsi istiqamətində ardıcıl addımlar atılır. Son illər qəbul edilən normativ-hüquqi aktlar hərbi xidmətin təşkili mexanizmlərinin çevikliyinin artırılmasına, peşəkar kadr potensialının gücləndirilməsinə və vətəndaşların hərbi xidmətə marağının stimullaşdırılmasına xidmət edir.
Bu kontekstdə Prezident İlham Əliyevin təsdiqlədiyi son qanunvericilik dəyişiklikləri ehtiyatdan çağırılan zabitlərin dinc dövrdə həqiqi hərbi xidmət müddətinə yenidən baxılmasını nəzərdə tutur. Qəbul edilən qərara əsasən, həmin kateqoriyaya aid zabitlərin xidmət müddəti 6 ay azaldılaraq 1 il müəyyən edilib. Bu dəyişiklik təkcə müddət məsələsi ilə məhdudlaşmır, eyni zamanda hərbi xidmətin daha səmərəli planlaşdırılması, zabit hazırlığı sisteminin optimallaşdırılması və könüllülük prinsipi əsasında xidmətə cəlbetmənin gücləndirilməsi məqsədi daşıyır.
Mütəxəssislər hesab edirlər ki, yeni yanaşma bir tərəfdən Silahlı Qüvvələrin kadr ehtiyaclarının balanslı şəkildə ödənilməsinə, digər tərəfdən isə ali təhsilli gənclərin hərbi xidmətə marağının artırılmasına müsbət təsir göstərəcək. Eyni zamanda, müddətli həqiqi hərbi xidmət dövründə zabit hazırlığı kursunu müvəffəqiyyətlə başa vuran şəxslərə leytenant rütbəsinin verilməsi hərbi karyera baxımından əlavə motivasiya mexanizmi kimi dəyərləndirilir.
Məsələ ilə bağlı hərbi ekspert Ibrahim Rüstəmli Crossmedia.az-la öz fikirlərini bölüşüb:
"Azərbaycanda ehtiyatdan çağırılan zabitlərin dinc dövrdə xidmət müddətinin azaldılması orduda aparılan islahatların mühüm istiqamətlərindən biri kimi qiymətləndirilə bilər. Bu addımın əsas məqsədi ondan ibarətdir ki, ehtiyatdan çağırılan zabitlər dinc dövrdə yalnız öz ixtisasları üzrə bilik və bacarıqlarını təkmilləşdirsin, bir il müddətində bu sahədə praktiki təcrübə qazansın və həmin müddətin sonunda ordudan tərxis olunsunlar.
Eyni zamanda qeyd edilməlidir ki, ehtiyatdan çağırılan zabitlər xidmət müddəti ərzində Müdafiə Nazirliyi ilə müəyyən müddətə müqavilə imzalamaqla hərbi xidmətlərini davam etdirə bilərlər. Bu mexanizmin əsas üstünlüklərindən biri ondan ibarətdir ki, mülki ali təhsil müəssisələrində ixtisaslaşmış kadrlar öz sahələrinə uyğun şəkildə kadr zabit heyətinə cəlb olunur.
Məlum olduğu kimi, ordunun komplektləşdirilməsi yalnız ali hərbi məktəblərin məzunları hesabına mümkün deyil. Orduda elə ixtisaslar mövcuddur ki, həmin sahələr üzrə kadr təminatı əsasən mülki ali təhsil ocaqlarının üzərinə düşür. Buraya həkimlər, hüquqşünaslar, informasiya təhlükəsizliyi üzrə mütəxəssislər, hərbi jurnalistlər və digər mühüm ixtisas sahibləri daxildir. Bu baxımdan ordunun kadr potensialının maksimum səviyyədə təmin olunması mülki və hərbi təhsil sistemlərinin qarşılıqlı şəkildə fəaliyyətini zəruri edir.
Həqiqi hərbi xidmətə çağırılan əsgərlərin xidmətinin daha səmərəli təşkili istiqamətində də mühüm addımlar atılmışdır. Belə ki, çağırışçıların böyük əksəriyyəti ali təhsilli şəxslərdir və onların xidmət müddəti bir il təşkil edir. Yüksək bilik və bacarıqlara, yaradıcı təfəkkürə malik olan bu gənclərin ixtisasları orduda xüsusi nəzərə alınır və onlar müvafiq sahələr üzrə xidmətə cəlb edilirlər".
Ekspert, həmçinin ehtiyatdan çağırılan zabitlərin dinc dövrdə xidmət müddətinin azaldılmasını məqsədəuyğun və qənaətbəxş hesab etdiyuni bildirib:
"Əgər ehtiyatda olan zabit orduda xidmətini davam etdirmək niyyətində deyilsə, bir illik xidmət müddəti onun hərbi mükəlləfiyyətinin yerinə yetirilməsi və peşə bacarıqlarının inkişafı üçün kifayət qədər yetərlidir. Əksinə, orduda qalmaq istəyən və perspektivli hesab olunan zabitlər üçün müqavilə əsasında xidmətin davam etdirilməsi imkanı mövcuddur. İlkin mərhələdə üçillik müqavilə imzalanır, sonra isə xidmətini davam etdirmək istəyənlər kadr zabit heyətinə daxil edilirlər.
Beləliklə, ehtiyatdan çağırılan zabitlərin bir il altı ay müddətində saxlanılması nə hərbi, nə də kadr siyasəti baxımından səmərəli hesab oluna bilər. Yeni yanaşma həm orduda qalmaq istəyənlər üçün real perspektiv yaradır, həm də xidmətini davam etdirmək niyyətində olmayan şəxslərə öz ixtisasları üzrə inkişaf üçün kifayət qədər zaman qazandırır.
Nəticə etibarilə, xidmət müddətinin azaldılması ehtiyatdan çağırılan zabitlərin kadr potensialının səmərəli idarə olunmasına, bilik və bacarıqlarının inkişafına, eyni zamanda ordunun peşəkar kadrlarla təmin edilməsinə xidmət edən düzgün və düşünülmüş bir qərardır".
Elmir Heydərli
09:51 14.01.2026
Oxunuş sayı: 1937
