21-ci əsr su qıtlığı əsri olacaq və Azərbaycan buna indidən hazırlaşır - DEPUTAT
Azərbaycan Prezidenti İlham Əliyevin sədrliyi ilə Bakı və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026-2035-ci illəri əhatə edən Dövlət Proqramına həsr olunmuş müşavirə keçirilib. Müşavirədə dövlət başçısı genişmiqyaslı infrastruktur layihələrinin əhəmiyyətindən danışıb, elektrik enerjisi, qazlaşma, yollar və körpülər sahəsində görülən işləri qeyd edib. Xüsusi olaraq içməli su və suvarma layihələrinin əhalinin rifahı üçün prioritet məsələ olduğu vurğulanıb, son 20 il ərzində tikilmiş “Taxtakörpü” və “Şəmkirçay” su anbarları kimi böyük su infrastrukturlarının rolu qeyd olunub. Dövlət başçısı, həmçinin işğaldan azad edilmiş ərazilərdə infrastrukturun yenidən qurulması prosesinin davam etdiyini diqqətə çatdırıb.
Keçirlirən müşavirə ilə bağlı deputat Hikmət Babaoğlu Crossmedia.az-a açıqlama verib. O bildirib ki, su ehtiyatlarının böyük əksəriyyəti işğaldan azad olmuş ərazilərimizdə formalaşır: ‘’Ümumilikdə Azərbaycan su ilə zəngin ölkə hesab olunmur. Ona görə də hazırda işğaldan azad olmuş ərazilərimizdə su ehtiyatlarımızdan səmərəli istifadə olunması çox mühüm bir vəzifə kimi dövlətimizin qarşısında durur. Azərbaycan Prezidenti və məhz son 5 ildə köhnə su anbarlarının, təzələnmiş su anbarlarının fəaliyyətini tənzimləmək üçün dövlətimiz tərəfindən müxtəlif addımlar atılıb. Eyni zamanda dağ sayıları üzərində çoxlu elektrik stansiyaları qurulub. Bu proses davam edir. Ayrıca 21-ci əsr su qıtlığı əsri kimi qalacaq və su problemi, ekoloji problemlər dünyanın ən əsas problemlərindən birinə çevrilməkdədir. Ona görə də Azərbaycan ərazisində bir neçə ildən əvvəl istismar edilmiş Göygöl və Xudafərin su anbarları həm suvarma üçün, həm də içməli su kimi istifadə ediləcək. Ancaq qeyd etdiyimiz kimi Azərbaycanın əsas su mənbələri Qafqazda yerləşir və içməli su ehtiyatlarımızın təminatında böyük rol oynayır’’.
Deputat qeyd edib ki, Azərbaycan Prezidentinin diqqətinə çatdırdığı, büdcəsini ayırdığı bu iki su anbarının istifadəyə verilməsi, önümüzdəki 100 ildə Azərbaycanın özünü şirin su ehtiyatları ilə təmin etməsi üçün mühüm strateji hadisə olacaq: ‘’Çünki get-gedə pozulan iqlim dəyişiklikləri və qlobal ekoloji problemlər bir çox ölkələri dərin sularını təmizləyərək içməli su kimi istifadə etməyə məcbur edir. Ancaq əlbəttə ki, bu plan yalnız Azərbaycanın bugünkü su ehtiyaclarının qarşılanması üçündür. Gələcək nəsillərimizin də su ehtiyaclarının qarşılanması üçün mühüm bir tarixi hadisə olacaq’’.
Sevinc Yarməmmədova
17:46 13.01.2026
Oxunuş sayı: 4137
