İsrail XİN başçısı Azərbaycana gəlir: Portfelində nələr var?
İsrailin xarici işlər naziri Gideon Saar yanvarın 26-da Azərbaycana səfər edəcək.
Səfər proqramında bir sıra görüşlər, o cümlədən Azərbaycanın xarici işlər naziri Ceyhun Bayramovla danışıqlar planlaşdırılıb.
Məlumata görə, Bakıdan sonra Gideon Saar Qazaxıstana gedəcək.
Yaxın Şərqdə gərginliyin artdığı, İran daxilində siyasi və sosial proseslərin diqqət mərkəzinə çevrildiyi bir dövrdə İsrailin xarici işlər nazirinin Azərbaycana planlaşdırılan səfəri müxtəlif şərhlərə yol açıb. Regionda baş verən proseslərin fonunda bu səfərin məqsədləri, mümkün mesajları və xüsusilə İran amili ilə əlaqələndirilib-əlaqələndirilməməsi məsələsi ictimai və ekspert müzakirələrinin əsas mövzularından birinə çevrilib.
Bəs, İsrail XİN rəhbərinin Azərbaycana səfəri hansı diplomatik çərçivədə dəyərləndirilməlidir? Bu səfər İran daxilindəki proseslərlə hansısa formada uzlaşırmı və ya İsrail–İran qarşıdurması fonunda Azərbaycan–İsrail münasibətlərində yeni əməkdaşlıq mərhələsindən danışmaq olarmı?
Məsələ ilə bağlı politoloq Elçin Xalidbəyli Crossmedia.az-a açıqlama verib:
"İsrail xarici işlər nazirinin Azərbaycana səfəri yalnız və yalnız Azərbaycan–İsrail münasibətləri kontekstində qiymətləndirilməlidir. İki ölkə arasında uzun illərə söykənən qarşılıqlı əməkdaşlıq və tərəfdaşlıq münasibətləri mövcuddur və bu çərçivədə rəsmi şəxslərin qarşılıqlı səfərləri mütəmadi xarakter daşıyır. İsrailin rəsmi dairələrini təmsil edən siyasətçilər indiyədək dəfələrlə Azərbaycana səfər ediblər və bu, tamamilə normal diplomatik prosesdir.
Bu səbəbdən İsrail xarici işlər nazirinin səfərində İran faktorunu axtarmaq əsassız və yanlış yanaşmadır".
Politoloq, həmçinin bildirib ki, Azərbaycan müstəqil xarici siyasət yeridən, öz prioritetləri əsasında fəaliyyət göstərən bir dövlətdir: "Hər hansı xarici dövlətin maraqları Azərbaycanın xarici siyasəti üçün həlledici əhəmiyyət daşımır. İsrail–İran münasibətləri yalnız bu iki ölkənin öz aralarında olan məsələdir və Azərbaycanın buna hər hansı aidiyyəti yoxdur.
Azərbaycan nə İsrailin, nə ABŞ-nin, nə Avropa İttifaqının, nə də başqa hər hansı xarici siyasi mərkəzin maraqları naminə fəaliyyət göstərir. Ölkəmiz xarici siyasətini yalnız milli dövlət maraqları çərçivəsində formalaşdırır və bu baxımdan İranda baş verən proseslərə qarışmır. Bu məsələlər İranın daxili işləridir".
O, əlavə edib ki, Azərbaycanın həm İranla, həm də İsraillə qarşılıqlı əməkdaşlıq və tərəfdaşlıq münasibətləri mövcuddur: "Azərbaycan heç bir xarici dövlətin İrana qarşı yönəlmiş addımlarını dəstəkləmir və belə planların tərkib hissəsi deyil. Bu baxımdan İsrail xarici işlər nazirinin Azərbaycana səfərində Azərbaycan–İsrail münasibətlərindən kənar hər hansı mövzunun müzakirə ediləcəyi ehtimalı inandırıcı görünmür".
Ayhan
09:37 13.01.2026
Oxunuş sayı: 2257
