Azərbaycandan Ermənistana enerji tədarükü müntəzəm xarakter ala bilər – Deputat
Azərbaycan ilə Ermənistan arasında enerji daşıyıcılarının nəqli sahəsində atılan addımlar regional iqtisadi əlaqələrin yeni mərhələyə qədəm qoyduğunu göstərir. 8 yanvar 2026-cı il tarixində Güzdək dəmiryol stansiyası və Bakı yük stansiyasından Ermənistana neft məhsullarının növbəti tədarükünün həyata keçirilməsi bu prosesin artıq davamlı xarakter aldığını təsdiqləyir. Müxtəlif növ benzin və dizel yanacağından ibarət olan bu daşımalar, ötən ay baş tutan ilk yanacaq ixracından sonra iki ölkə arasında formalaşan iqtisadi-logistika əməkdaşlığının mühüm göstəricisi kimi qiymətləndirilir.
Bu barədə Crossmedia.az-a açıqlama verən Milli Məclisin deputatı Tənzilə Rüstəmxanlı bildirib ki, Azərbaycandan Ermənistana neft məhsullarının göndərilməsi ilə bağlı qəbul edilən qərar deklarativ deyil, tamamilə praktik xarakter daşıyır.
Deputatın sözlərinə görə, burada söhbət nümayişkaranə jestdən yox, Azərbaycanın sülh gündəminə sadiqliyini və bu xəttin ardıcıl şəkildə real addımlarla həyata keçirildiyini göstərən konkret təşəbbüslərdən gedir:
“Azərbaycan ondan çıxış edir ki, sülh gündəmi inkişaf edəcək, etimad mühiti isə getdikcə güclənəcək. Xüsusilə Ermənistanın Baş naziri Nikol Paşinyanın son dövrlərdə ölkə daxilində revanşist qüvvələrin cilovlanması istiqamətində atdığı addımlar fonunda bu proses daha aydın görünür. Azərbaycan ərazisinin Ermənistan üçün taxıl tranzitinə açılması, indi isə neft məhsullarının birbaşa tədarükünün həyata keçirilməsi bir daha sübut edir ki, Azərbaycandan Ermənistana qarşı heç bir təhlükə yoxdur və ola da bilməz. Azərbaycan Ermənistanın mövcud rəhbərliyini və ümumilikdə erməni cəmiyyətini hərbi-siyasi rəqib kimi deyil, dayanıqlı sülh naminə əməkdaşlıq edilə bilən tərəf kimi görür”.
Deputat vurğulayıb ki, əgər sülh gündəmi israrlı şəkildə irəli aparılarsa, sülh müqaviləsi imzalanar və Ermənistanın konstitusiyasında zəruri dəyişikliklər edilərsə, bu cür enerji və logistika tədarükləri müntəzəm xarakter ala bilər:
“Bu, Ermənistanın regional iqtisadi və nəqliyyat əlaqələrinə inteqrasiyasına real imkanlar yaradacaq. Burada qarşılıqlı fayda mövcuddur. Bu addımlar Ermənistan daxilində də daxili siyasi diskursa təsirsiz ötüşməyəcək. Cəmiyyət regionda sülhə, sabitliyə və inkişafa əslində kimin maraqlı olduğunu daha aydın şəkildə dərk edəcək”.
Mehriban Yariyeva
09:30 09.01.2026
Oxunuş sayı: 1814
