Azərbaycan Fələstin məsələsində öz prinsipial və ardıcıl mövqeyini ortaya qoyur - RƏY
Prezident İlham Əliyevi yanvarın 5-də yerli media orqanlarına müsahibəsi zamanı Fələstinlə bağlı səsləndirdiyi fikirlər Azərbaycanın xarici siyasətinin prinsipial xəttini, tarixi təcrübədən doğan mövqeyini və beynəlxalq münasibətlərə realist yanaşmasını açıq şəkildə ortaya qoyur. Dövlət başçısı bir tərəfdən Azərbaycanın vaxtilə üzləşdiyi ədalətsizlikləri və beynəlxalq səviyyədə tək buraxıldığı mərhələni xatırladır, digər tərəfdən isə Bakının bu gün də beynəlxalq hüquqa, dövlətlərin suverenliyinə və qarşılıqlı hörmət prinsipinə əsaslanan mövqeyini qoruduğunu vurğulayır.
Bu yanaşma, xüsusilə Fələstin məsələsi kontekstində, Azərbaycanın emosional deyil, məsuliyyətli və balanslı siyasət apardığını göstərir. Azərbaycan həm beynəlxalq platformalarda Fələstin dövlətinin yaradılmasını dəstəkləyir, həm də regional problemlərin ilk növbədə həmin regionun ölkələri tərəfindən həll edilməli olduğu prinsipini əsas götürür. Prezidentin bu açıqlaması, əslində, Bakının dostluq, həmrəylik və real siyasi məsuliyyət arasında qurduğu incə tarazlığın ifadəsidir.
Rəsmi Bakının Fələstinlə bağlı mövqeyi və dövlət başçısının səsləndirdiyi fikirlər barədə Crossmedia.az-a danışan Milli Məclisin deputatı Ceyhun Məmmədov bildirib ki, cavabın bu şəkildə ifadə edilməsində bir sıra mühüm və vacib məqamlar, əsaslandırıcı faktorlar mövcuddur: "Şübhəsiz ki, Azərbaycan hər zaman müsəlman dünyasının ayrılmaz bir parçası kimi bu coğrafiyanı narahat edən məsələlərə münasibət bildirib. Eyni zamanda, Azərbaycan bu məsələlərdə müsəlman ölkələrinin dəstəyini daim hiss edib və bu dəstəyi konkret şəkildə görüb. Bu gün də Azərbaycan müstəqil Fələstin dövlətinin yaradılması ilə bağlı BMT-nin müvafiq qətnamələrini açıq şəkildə dəstəkləyir. Azərbaycan Fələstində nümayəndəlik açmaqla yanaşı, Fələstin tərəfinə humanitar və maliyyə yardımı da göstərir. Burada söhbət yalnız iri maliyyə vəsaitlərindən deyil, eyni zamanda məktəblərin tikintisi və sosial layihələrin həyata keçirilməsindən gedir. Hazırda Fələstində Azərbaycan dövlətinin himayəsi ilə fəaliyyət göstərən nümayəndəlik vasitəsilə həm maddi, həm də mənəvi dəstək təmin olunur".
Deputatın fikrincə, bütün bunlar bir daha onu göstərir ki, Azərbaycan bu məsələdə də öz prinsipial və ardıcıl mövqeyini ortaya qoyur: "Eyni zamanda, Fələstin məsələsi yalnız humanitar deyil, həm də regional və qlobal təhlükəsizlik baxımından ciddi əhəmiyyət daşıyan bir mövzudur. Azərbaycan bu kontekstdə fərqli, balanslı və məsuliyyətli yanaşma nümayiş etdirir. Burada Azərbaycanın əsas hədəfi insan həyatının, insan ləyaqətinin və sülhün qorunmasıdır. Azərbaycan hər zaman öz dəstəyini açıq şəkildə ifadə edir və bu mövqeyin qarşılıqlı şəkildə, yəni digər müsəlman ölkələri tərəfindən də Azərbaycana münasibətdə sərgilənməsinin vacibliyini vurğulayır. Bu baxımdan, belə bir yanaşmanın ciddi siyasi və mənəvi əsasları mövcuddur. Azərbaycan həm milli maraqlarını, həm də birlik və həmrəylik prinsipini qoruyaraq, beynəlxalq müstəvidə düzgün və balanslı mövqeyini nümayiş etdirməyə davam edir".
Ayhan
11:47 08.01.2026
Oxunuş sayı: 1706
