Azərbaycan üçün prioritet öz ərazisinin təhlükəsizliyi və vətəndaşlarının qorunmasıdır - Açıqlama
Müasir dövrdə beynəlxalq siyasət getdikcə mürəkkəbləşir və dövlətlərin xarici münaqişələrə münasibəti yalnız ideoloji və emosional səbəblərlə deyil, strateji və praqmatik hesablamalarla müəyyən olunur. Regional və qlobal qarşıdurmaların intensivləşdiyi bir şəraitdə dövlətlərin əsas vəzifəsi öz ərazisinin təhlükəsizliyini təmin etmək, vətəndaşlarının həyat və azadlıqlarını qorumaqdır. Bu məqsədlər dövlət siyasətinin mərkəzində dayanır və hər hansı xarici hərbi müdaxilə bu prioritetlərlə uyğun olmalıdır.
Xüsusilə Yaxın Şərq kimi çoxsaylı siyasi, etnik və dini ziddiyyətlərin bir araya gəldiyi regionlarda baş verən silahlı münaqişələr, tərəflər arasında barışmaz münasibətlər və humanitar böhranlar dövlətlər üçün əlavə risklər yaradır. Belə mürəkkəb şəraitdə hərbi iştirak yalnız potensial insan itkisi ilə nəticələnmir, həm də ölkənin siyasi və diplomatik mövqeyinə təsir göstərərək uzunmüddətli nəticələrə yol açır. Buna görə də hər bir dövlət, o cümlədən Azərbaycan, regionlarda iştirak strategiyasını diqqətlə və məsuliyyətlə müəyyən etməlidir.
Eyni zamanda, beynəlxalq hüququn prinsipləri və humanitar qaydalar hər bir dövlətin davranışında əsas meyar kimi çıxış edir. Dövlətlər həm öz təhlükəsizliyini təmin etməli, həm də qlobal və regional sabitliyin qorunmasına töhfə verməlidirlər. Azərbaycan da bu çərçivədə öz siyasətini qurur, humanitar yardımları və diplomatik dəstəyi konkret şəraitə uyğun şəkildə həyata keçirir.
Bütün bunlar nəzərə alınaraq, dövlətlərin xarici münaqişələrə qoşulub-qoşulmama qərarları emosiyalardan deyil, milli maraqlar, beynəlxalq hüquq və təhlükəsizlik hesablamalarından çıxış edərək verilməlidir. Bu baxımdan, Azərbaycanın mövqeyi də milli təhlükəsizlik, regional sabitlik və beynəlxalq hüququn tələbləri çərçivəsində dəyərləndirilməlidir.
Məsələ ilə bağlı Ədalət Partiyasının sədri Mütəllim Rəhimli Crossmedia.az-la öz fikirlərini bölüşüb:
"Azərbaycan üçün əsas prioritet öz ərazisinin təhlükəsizliyi və vətəndaşlarının qorunmasıdır. Ordumuzun əsas vəzifəsi ölkəni müdafiə etməkdir. Digər regionlarda baş verən silahlı münaqişələrə qoşulmaq bizim məqsədlərimizə daxil ola bilməz. Çünki mürəkkəb və uzunmüddətli münaqişələrdə hərbi iştirak əlavə risklər yaradır.
Azərbaycanın Qəzza ilə bağlı sülhməramlı əməliyyatlara qoşulmaq istəməməsi praqmatik yanaşma kimi qiymətləndirilməlidir. Yaxın Şərqdəki vəziyyət qeyri-sabitdir və tərəflər arasında qarşıdurma kifayət qədər barışmaz xarakter daşıyır. Belə şəraitdə hərbi iştirak həm insan itkisi, həm də siyasi nəticələr baxımından risklidir. Azərbaycan bu risklərdən kənarda qalsa daha yaxşıdır.
Eyni zamanda, bu mövqe əzilən insanların taleyinə və Fələstin məsələsinə laqeyd münasibət anlamına gəlmir. Azərbaycan beynəlxalq hüququ və humanitar prinsipləri dəstəklədiyini dəfələrlə bəyan edib. Fələstin xalqına humanitar yardımları və diplomatik dəstəyi hər zaman göstərmişik.
Bu mövqenin Azərbaycan üçün müsbət tərəfləri var. Ən vacib məqam vətəndaşların təhlükəsizliyinin qorunması və ölkəmizin beynəlxalq oyunların qurbanına çevrilməsinin qarşısının alınmasıdır. Hərbi və təhlükəsizlik kimi risklərdən uzaq qalmaq daha məqsədəuyğundur. Onu da nəzərə almaq lazımdır ki, Azərbaycan regional sabitliyin qorunub saxlanılmasında maraqlıdır. Bunun üçün öz ordusunun gücünə arxalanır və hazırda bu gücə ehtiyacımız var".
Partiya sədri həmçinin Azərbaycan Prezidentinin müsahibəsində ölkənin Fələstin ərazisinə, o cümlədən Qəzza zolağına hərbi qüvvə göndərməyəcəyini bəyan etməsi bəzi xarici dairələrdə narazılıq və tənqidlər yaratdığını bildirib:
"Xüsusilə, münaqişəyə emosional yanaşan qrupların Azərbaycandan daha aktiv rol gözlədiyi məlum olub. Bu isə sosial şəbəkələrdə bəzilərinin ittihamları, onlara verilən cavablar və nəhayətdə qarşıdurmalarla müşayiət olunur.
Xarici sosial şəbəkələrdə səsləndirilən tənqidlər ya emosional, ya da qərəzli yanaşmalardır. Halbuki hərbi qərarlar emosiyalarla deyil, konkret hesablamalar əsasında verilir. Bu cür qərarlarda beynəlxalq hüquq, milli təhlükəsizlik və real imkanlar əsas götürülür. Azərbaycan da bu məsələdə beynəlxalq praktikaya uyğun davranır və öz milli maraqlarından çıxış edir. Hər hansı münaqişəyə hərbi şəkildə qoşulmaq hər bir dövlətin suveren seçimidir və bu seçim ictimai təzyiqlərlə deyil, dövlət məsuliyyəti ilə müəyyən olunur".
Elmir Heydərli
11:40 08.01.2026
Oxunuş sayı: 1970
