Yeni dünya nizamının formalaşdığı bir vaxtda Azərbaycanın atdığı addımlar xüsusi əhəmiyyət daşıyır -RƏY
Azərbaycan Prezidenti İlham Əliyev yanvarın 5-də yerli televiziya kanallarına müsahibəsində bildirib ki, D-8 təşkilatına üzv olmağımızı çox böyük nailiyyət kimi qiymətləndirirəm. Çünki bu təşkilat 30 ilə yaxındır ki, yaradılmışdır və yarandığı gündən yeni üzv qəbul etməmişdir.
Müsəlman dünyasının ən böyük ölkələrini birləşdirən D-8 təşkilatın yeganə yeni üzvünün Azərbaycan olduğunu vurğulayan dövlətimizin başçısı deyib: "Bu təşkilatda birləşən ölkələrin ümumi əhalisi bir milyarddan, ümumi iqtisadiyyatı dörd trilyondan çoxdur. Azərbaycan nə əhali, nə iqtisadiyyat baxımından böyük ölkə sayıla bilməz. Bizim orada artıq rəsmən iştirakımız, əlbəttə ki, bizə olan hörmətin əlamətidir və bizim apardığımız müstəqil siyasətin nəticəsidir və dərhal biz fəal işlərə başladıq".
Müasir beynəlxalq münasibətlər sistemində dövlətlərin nüfuzu təkcə ərazi, əhali və ya iqtisadi göstəricilərlə deyil, eyni zamanda həyata keçirdikləri ardıcıl, prinsipial və müstəqil siyasətlə müəyyən olunur. Qlobal siyasi və iqtisadi balansların yenidən formalaşdığı bir dövrdə Azərbaycanın beynəlxalq təşkilatlar çərçivəsində artan rolu və etibarlı tərəfdaş kimi qəbul edilməsi ölkəmizin strateji uğurlarından biri kimi dəyərləndirilə bilər.
Bu baxımdan, Azərbaycanın İqtisadi Əməkdaşlıq Təşkilatı olan D-8-ə üzv qəbul edilməsi təkcə diplomatik nailiyyət deyil, eyni zamanda dövlətimizin artan beynəlxalq nüfuzunun və çoxşaxəli xarici siyasətinin məntiqi nəticəsidir. Uzun illər ərzində qapalı formatda fəaliyyət göstərən bu təşkilata Azərbaycanın dəvət olunması ölkəmizin regional və qlobal proseslərdə tutduğu mövqenin, eləcə də beynəlxalq ictimaiyyət tərəfindən göstərilən yüksək etimadın bariz nümunəsidir.
Bu barədə Milli Məclisin deputatı Məlahət İbrahimqızı Crossmedia.az-la öz fikirlərini bölüşüb: "Məlum olduğu kimi, ənənəvi olaraq hər il yanvarın 7-də Azərbaycan Respublikasının Prezidenti, möhtərəm cənab İlham Əliyev bir qrup yerli televiziya kanallarına geniş müsahibə verir. Dövlətimizin Başçısı bu müsahibədə ötən ilin yekunlarını dəyərləndirərək, qarşıdakı dövr üçün nəzərdə tutulan prioritetləri və strateji yol xəritəsini ictimaiyyətə təqdim etmişdir. Ümumilikdə, müsahibə zamanı möhtərəm Prezidentimiz həm ölkəmizdə, həm regionumuzda, həm də dünyada baş verən aktual geosiyasi proseslərə münasibət bildirmiş, Azərbaycanın daxili və xarici siyasətinin əsas istiqamətləri və əldə olunmuş uğurları barədə ətraflı məlumat vermişdir. Dövlət başçısı çıxışında Azərbaycanın xarici siyasətində qazanılmış mühüm nailiyyətləri geniş şəkildə şərh edərək, ölkəmizin D-8 (İqtisadi Əməkdaşlıq Təşkilatı) qrupunun D-9 formatında genişlənməsi çərçivəsində üzvlüyə qəbul olunmasının xüsusi əhəmiyyətini vurğulamışdır. Qeyd edilməlidir ki, cənab Prezidentin də bildirdiyi kimi, Azərbaycanın bu təşkilata üzv qəbul edilməsi olduqca böyük siyasi və iqtisadi nailiyyətdir. Təxminən 30 ilə yaxın müddətdə fəaliyyət göstərən D-8 təşkilatı yarandığı gündən bu günə qədər ilk dəfə olaraq yeni üzv qəbul etmişdir və bu baxımdan Azərbaycanın üzvlüyü tarixi xarakter daşıyır. Məlumdur ki, bu təşkilatda müsəlman dünyasının ən böyük və təsirli dövlətləri birləşir. Azərbaycanın D-8-ə üzv qəbul edilməsi təkcə ölkəmiz üçün deyil, eyni zamanda təşkilatın özü üçün də mühüm uğur hesab edilə bilər. Təşkilata üzv olan ölkələrin ümumi əhalisi bir milyard nəfərdən, ümumi iqtisadi potensialı isə dörd trilyon ABŞ dollarından artıqdır. Azərbaycan əhali və iqtisadi göstəricilər baxımından böyük dövlət olmasa da, məhz beynəlxalq nüfuzu, müstəqil və prinsipial siyasəti, regional və qlobal proseslərdə etibarlı tərəfdaş kimi tanınması sayəsində bu təşkilata üzv seçilmişdir. Ali Liderimiz vurğulamışdır ki, Azərbaycanın bu qrupun genişlənməsində iştirakı D-9 formatının siyasi və iqtisadi potensialının artmasına, xarici investisiyaların cəlb olunmasına, Şərq–Qərb və Şimal–Cənub nəqliyyat dəhlizlərində ölkəmizin rolunun möhkəmlənməsinə, eləcə də Azərbaycanın beynəlxalq uğurlarının artmasına və dünya iqtisadiyyatındakı mövqeyinin daha da güclənməsinə mühüm töhfələr verəcəkdir".
O bildirib ki, yeni dünya nizamının formalaşdığı mürəkkəb və ziddiyyətli bir dövrdə Azərbaycanın belə strateji qərarlar qəbul etməsi və yaranan imkanlardan səmərəli şəkildə yararlanması xüsusi əhəmiyyət kəsb edir: "D-8 təşkilatının D-9 formatında genişlənməsi üzv dövlətlər arasında siyasi və iqtisadi təsirin artmasına, birgə inkişafın təmin olunmasına, qarşılıqlı faydalı əməkdaşlıq əlaqələrinin qurulmasına və daha güclü iqtisadi birlik formalaşdırılmasına əlverişli zəmin yaradır. Azərbaycanın D-9-a üzv olması gələcəkdə Qafqaz regionunun geosiyasi və iqtisadi dinamikasına ciddi təsir göstərərək, ölkəmizin regiondakı mövqeyini daha da möhkəmləndirəcəkdir. Bu üzvlük, eyni zamanda, xarici investisiyaların ölkəmizə cəlb edilməsi üçün yeni imkanlar açır, nəqliyyat-logistika layihələri baxımından Azərbaycanın Şərq–Qərb və Şimal–Cənub dəhlizlərindəki birləşdirici rolunu daha da gücləndirir".
Deputat, həmçinin Azərbaycanın D-9 çərçivəsində iştirakı ölkəmizin beynəlxalq aləmdəki nüfuzunun artmasına və dünya iqtisadiyyatındakı rolunun daha da möhkəmlənməsinə xidmət etdiyini qeyd edib: "Xüsusilə, bu gün dünya hüququnun ciddi sınaqlarla üzləşdiyi, qlobal qeyri-müəyyənliyin artdığı bir mərhələdə Azərbaycanın bu cür strateji platformalarda təmsil olunması ölkəmizin gələcək üçün düzgün və uzaqgörən qərarlar qəbul etməsinə, mövcud fürsətlərdən maksimum dərəcədə faydalanmasına geniş imkanlar yaradır".
Elmir Heydərli
13:44 07.01.2026
Oxunuş sayı: 2809
