Azərbaycan–İran münasibətlərində real addımlar həlledici olacaq – Deputat
Cənubi Qafqazda dəyişən geosiyasi reallıqlar fonunda Azərbaycan–İran münasibətləri yeni mərhələyə daxil olmaqdadır. Rəsmi Tehran Bakı ilə əlaqələrin perspektivlərini yenidən nəzərdən keçirərək, münasibətlərin müxtəlif sahələr üzrə dərinləşdirilməsinə xüsusi önəm verir. Bu baxımdan İranın xarici işlər naziri Abbas Əraqçinin ölkəsinin Bakıdakı səfiri ilə keçirdiyi son görüş tərəflər arasında əməkdaşlığın gələcək istiqamətləri baxımından diqqət çəkir.
Bu görüş kontekstində ikitərəfli münasibətlərin perspektivi barədə
Crossmedia.az-a açıqlama verən Milli Məclisin deputatı Azər Badamov bildirib ki, Əraqçinin Azərbaycanla münasibətlərin iqtisadi, tranzit, siyasi, mədəni və humanitar sahələr üzrə gücləndirilməsinin vacibliyi ilə bağlı səsləndirdiyi fikirlər ikitərəfli əlaqələrin inkişafına töhfə verə bilər.
Deputatın sözlərinə görə, burada əsas məsələ sadəcə mesajlar səsləndirmək və bəyanatlar vermək deyil, bu mövqenin real və praktik addımlarla təsdiqlənməsidir:
“Görünən odur ki, Pezeşkian prezident seçildikdən sonra Azərbaycan–İran münasibətlərində müəyyən irəliləyişlər müşahidə olunur. O, Azərbaycanın İrandan uzaq düşməsinin səbəblərinin kənarda deyil, məhz İranın əvvəlki siyasətində axtarılmalı olduğunu açıq şəkildə ifadə etmişdi”.
A.Badamov xatırladıb ki, əvvəlki dövrlərdə İran tərəfindən Azərbaycana qarşı mütəmadi sərt açıqlamalar verilir, hətta Tehranda Azərbaycan səfirliyinə silahlı hücum baş vermişdi:
“Pezeşkian hakimiyyətə gəldikdən sonra bu məsələlər müəyyən qədər yoluna qoyuldu və səfirliyimizin fəaliyyəti bərpa edildi. Bu, münasibətlərdə müsbət siqnal kimi qiymətləndirilə bilər. Hazırkı mərhələdə İranın rəsmi icra hakimiyyətinin Azərbaycanla münasibətləri inkişaf etdirməyə yönəlik mövqeyinə baxmayaraq, ruhanilərin yanaşması hələ də adekvat deyil. Xüsusilə Zəngəzur dəhlizinin açılmasının İranın "qırmızı xətti" kimi təqdim edilməsi məntiqsiz yanaşmadır və bu cür açıqlamalar ölkələrimiz arasında münasibətlərə zərər vurur”.
Onun fikrincə, İran, doğrudan da, iqtisadi, tranzit, siyasi, mədəni və humanitar sahələrdə əməkdaşlığı genişləndirmək niyyətindədirsə, bu mövqe ruhanı hakimiyyət tərəfindən də dəstəklənməlidir:
“Şimal–Cənub dəhlizi üzrə əməkdaşlıqda niyyətlər üst-üstə düşürsə, eyni yanaşma Zəngəzur dəhlizinə münasibətdə də olmalıdır. Çünki Zəngəzur dəhlizi İranın milli maraqlarına zidd deyil. Əksinə, bu dəhliz Naxçıvan üzərindən Fars körfəzinə qədər uzanmaqla Şimal–Cənub nəqliyyat dəhlizinin funksionallığını daha da genişləndirə bilər. İran humanitar və mədəni əməkdaşlıqdan çəkinməməlidir. Mədəni xətt üzrə münasibətlərin inkişafı iki ölkə arasında mövcud olan gərginliyin aradan qaldırılmasına ciddi töhfə verə bilər.
Parlamentari qeyd edib ki, İran tərəfindən münasibətlərin inkişafında maraqlı olunduğuna dair oxşar açıqlamalar əvvəlki illərdə də səsləndirilib, lakin praktik addımlar zəif olub və real siyasət fərqli istiqamətdə aparılıb:
“Məhz buna görə də rəsmi Bakı İranla münasibətlərdə ehtiyatlı mövqe tutmağa məcburdur. Əraqçinin bəyanatı diplomatik baxımdan düzgün və vaxtında verilmiş mesajdır. Lakin Azərbaycan–İran münasibətlərində real dönüş nöqtəsinin yaranıb-yaranmayacağını sözlər deyil, atılacaq ilk praktik addımlar göstərəcək”.
Mehriban Yariyeva
17:35 06.01.2026
Oxunuş sayı: 10289
