Azərbaycan–ABŞ münasibətləri pozitiv istiqamətə doğru dəyişib
ABŞ-də fəaliyyət göstərən Qlobal Siyasət İnstitutunun prezidenti Paolo fon Şirax bildirib ki, hazırda Azərbaycan və ABŞ arasındakı münasibətlər çox yaxşıdır, lakin bu həmişə belə olmayıb. Onun sözlərinə görə, Azərbaycanın Qarabağ bölgəsindəki konflikti uzun müddət ABŞ mediasında mənfi işıqlandırılıb və Vaşinqton uzun illər boyunca Azərbaycana qarşı birtərəfli mövqe nümayiş etdirib.
Bu barədə Crossmedia.az xəbər verir.
Mütəxəssis vurğulayıb ki, hazırda vəziyyət tamamilə fərqlidir. Azərbaycan əsasən öz resursları hesabına ərazisi üzərində tam nəzarəti bərpa edib, bu da Vaşinqtonda fərqli qəbul və atmosfer yaradıb. Avqust ayında Azərbaycan Prezidenti İlham Əliyev və Ermənistan Baş naziri Nikol Paşinyanın Vaşinqtona səfəri və Prezident Donald Tramp ilə sammiti münasibətlərin yüksək səviyyəyə qalxmasına səbəb olub.
Paolo fon Şirax qeyd edib ki, TRIPP layihəsi (Trampın Beynəlxalq Sülh və Rifah Marşrutu, Zəngəzur dəhlizi) çərçivəsində 40–50 km uzunluğunda yol önəmli tranzit dəhlizi yaradacaq və Türkiyədən başlayaraq Adriatik dənizinə qədər uzanan avtomagistralın əsası olacaq. Bu yol Avropa ilə Mərkəzi Asiya və Yaxın Şərqi birləşdirərək Azərbaycanı yeni regional mərkəzə çevirəcək və sülh, inkişaf, investisiya və ticarət əlaqələrinin genişlənməsinə töhfə verəcək.
Ekspert əlavə edib ki, Ağ Evdə 2025-ci ilin avqustunda keçirilən sammitdən sonra Azərbaycan–ABŞ münasibətləri pozitiv istiqamətə doğru inkişaf edir.
Türkanə Məşədiyeva
14:54 29.12.2025
Oxunuş sayı: 3096
