Azərbaycan və Türkiyə çiyin- çiyinə: İrəvan üzərində siyasi və mənəvi nüfuzumuz da daha da güclənəcək
Azərbaycan–Türkiyə münasibətlərinin strateji müttəfiqlik xarakteri regional proseslər fonunda bir daha özünü qabarıq şəkildə göstərir. Xüsusilə Cənubi Qafqazda sülhün və sabitliyin təmin olunması məsələsində Ankara və Bakı arasında mövcud olan sıx koordinasiya prinsipial əhəmiyyət daşıyır.
Xarici işlər naziri Ceyhun Bayramovun bu günlərdə keçirdiyi mətbuat konfransında səsləndirdiyi fikirlər də göstərir ki, Türkiyə Ermənistanla münasibətlərində hər zaman Azərbaycanla uzlaşdırılmış və qarşılıqlı etimada əsaslanan siyasət yürüdür. Qardaşlıq, tarixi bağlılıq və müttəfiqlik üzərində qurulan bu münasibətlər çərçivəsində Ankara Azərbaycan–Ermənistan normallaşma prosesinə xüsusi həssaslıqla yanaşır və öz addımlarını Bakının mövqeyi ilə uzlaşdırır. Rəsmi Bakının mövqeyinə görə, regionda atılan bütün diplomatik addımlar qarşılıqlı maraqlar və strateji tərəfdaşlıq prinsipləri əsasında həyata keçirilir.
Məsələ ilə bağlı Milli Məclisin İnsan hüquqları komitəsinin sədri, Sosial Tədqiqatlar Mərkəzinin İdarə Heyətinin sədri Zahid Oruc Crossmedia.az-la öz fikirlərini bölüşüb:
"Qeyd etmək lazımdır ki, 1990-cı illərdən sonra Qardaş Türkiyənin Ermənistanla sərhədləri bağlaması nəinki iqtisadi və hərbi baxımdan əhəmiyyətli idi, həm də siyasi baxımdan Azərbaycanın mövqeyinin müdafiəsi və onun dünyada tək olmadığının göstəricisi idi. Eyni zamanda, bu addım Ermənistana ciddi mesaj verir ki, qarşıdakı dövrdə sanksiyaların təsiri daim özlərini hiss etdirəcək. Nəzərə almaq lazımdır ki, Ermənistanın faktiki olaraq işğal səbəbindən yalnız İran vasitəsilə xarici çıxışı mövcud idi. Qərb ölkələri ilə münasibətləri, Rusiyaya isə yalnız məhdud yollarla əlaqəsi, problemlərinin həllinə yetərli deyildi. Nəticədə, Ermənistan işğalın ən böyük zərbələrini öz üzərində yaşadı. Faktiki olaraq, Ermənistan tədricən özünü tənzimlədi, lakin böyük iqtisadi gəlirlərdən məhrum oldu. Azərbaycanın isə Bakı–Tiflis–Ceyhan, həmçinin dəmir yolu və digər logistik-qlobal layihələrinin əhəmiyyəti Ermənistan üzərindən reallaşdırılacaq və faydalarını Azərbaycan yaşayacaq. Nəqliyyat vasitəsilə Qərb ölkələrinə gedən insanlar artıq görürlər ki, ermənilər nə qədər itki veriblər. Rasional düşünən, nifrət duyğusundan uzaq ermənilər də başa düşürdülər ki, işğal onlar üçün böyük bədəl ödədirdi. Hazırda isə artıq 5 ildir qələbəmizin təsirlərindən danışırıq. O dövrdə Türkiyə–Azərbaycan münasibətləri həm hərbi, həm də təhlükəsizlik baxımından daha da inkişaf etmişdi".
Deputat, həmçinin Ermənistanın Türkiyə qarşı ərazi və soyqırım iddiaları da Qarabağ zəfərinin nəticəsində ortadan qalxdığını qeyd edib: "Bu, əslində böyük strateji nailiyyətdir. Ermənistan imperiyaların əlində belə ciddi vasitələrə malik deyildi. Həmişə bu cür mövzular Ermənistan üçün müəyyən təsir mexanizmi rolunu oynayırdı və biz görürdük ki, region dövlətləri və digər tərəflər Türkiyə ilə münasibətlərini məhz bu məsələlər üzərindən qururdular. Hazırkı dövrdə isə Qarabağ zəfərinin Türkiyə üçün həm siyasi, həm də praktiki faydası ondadır ki, bölgədə mövcud imkanlar daha səmərəli şəkildə istifadə olunur. İki qardaş ölkənin gələcəkdə Ermənistan üzərində vahid strategiya izləməsi, ümumiyyətlə Zəngəzur dəhlizinin reallaşması və digər proseslərdə çiyin-çiyinə addım atması mümkün olacaq. Eyni zamanda, İrəvan üzərində siyasi və mənəvi nüfuzumuz da daha da güclənəcək".
14:46 29.12.2025
Oxunuş sayı: 20209
