Macar ekspert: “Azadlığa Dəstək Aktı”na 907-ci düzəliş ədalətsizdir
ABŞ Konqresi tərəfindən Qarabağ münaqişəsinin ilkin mərhələsində qəbul edilmiş “Azadlığa Dəstək Aktı”na 907-ci düzəliş başlanğıcdan etibarən ədalətsiz və siyasi baxımdan qərəzli olub.
Bu barədə Crossmedia.az AZƏRTAC-a istinadən xəbər verir.
Macar politoloq, beynəlxalq hüquq və postsovet münaqişələri üzrə ekspert Attila Harqitai bildirib ki, sözügedən düzəliş Azərbaycanın guya Ermənistana qarşı “blokada” tətbiq etməsi ilə bağlı yanlış tezisə əsaslanıb və real vəziyyəti əks etdirməyib. O vurğulayıb ki, faktlar əksini sübut edir:
“Azərbaycan Ermənistanı blokadaya almamışdı. Əksinə, məhz Ermənistan Meğri rayonunda, eləcə də vaxtilə işğal altında olmuş Zəngilan, Cəbrayıl və Füzuli rayonlarında dəmir yolu xətlərini sökərək özünü mühüm nəqliyyat marşrutlarından və xarici kommunikasiya xətlərindən təcrid edib. Buna baxmayaraq, İrəvan Bakını ‘blokada’da ittiham edib və ABŞ-dəkı lobbi resurslarından istifadə edərək Konqresdə yalnız bir tərəfə – özü də zərərçəkmiş tərəfə qarşı yönəlmiş 907-ci düzəlişin qəbuluna nail olub”, – deyə A. Harqitai qeyd edib.
Politoloqun fikrincə, hazırda bu norma təkcə köhnəlmiş deyil, eyni zamanda açıq-aşkar anaxronik xarakter daşıyır. O bildirib ki, sülh sazişi paraflanıb, regional kommunikasiyalar bərpa olunub, Azərbaycan ərazisi vasitəsilə Ermənistana yük daşımaları yenidən həyata keçirilir:
“Yeni reallıq yeni siyasi qərarlar tələb edir. Bu şəraitdə 907-ci düzəlişin saxlanılmasının nə hüquqi, nə də mənəvi əsası var. Üstəlik, ABŞ prezidentinin özü də onun ləğvini dəstəklədiyini açıqlayıb. Artıq bu ədalətsiz düzəlişi birdəfəlik ləğv etməyin vaxtıdır”, – deyə ekspert vurğulayıb.
Türkanə Məşədiyeva
12:30 27.12.2025
Oxunuş sayı: 3805
